E vaiaso atoa ma nai aso sa faataunuuina ai le togalauapiga tele a Faifeau Sinia ma o latou faletua (Senior Pastors) o le ekalesia Worship Centre i le lalolagi atoa, i se tasi o pitonuu i Ueligitone i Niu Sila.
O le faamoemoe o lenei mafutaga, sa faatāuaina ai talosaga, poo le soifua tatalo, ma isi vaega o faiga ma aga, e saga faamalosia, ma saga faaaupegaina ai pea le aufaigaluega, mo galuega lelei uma e atinaeina ai ekalesia o loo galulue ai, ae faapea foi le tino o le Ekalesia Aoao i le lalolagi atoa.
O se mafutaga e masani ai le ekalesia ona faataunuina ma e i totonu o lana polokalame ma le manulauti faataatia alualumamao i vaitaimi e pei ona faatulagaina ai. O lea foi tauaofiaga sa masani ona auai faatasi Faifeau Sinia, faapea foi ma Faifeau Lagolago, peitai o le tausaga nei, o se taimi muamua lea ua faatulagaina ai ua na o Faifeau Sinia. O se suiga sa mataituina e Taitai ma sa iai foi nisi o vaega sa manaomia ai le faia o lea suiga, e pei ona faataunuuina i lenei tausaga.
O se mafutaga sa vaaia ai le tele o faamanuiaga eseese a le Atua, sa liligi ifo i vaega taitasi sa faatinoina i lea togalauapiga, aemaise ai meaalofa o loo faaaogāina ai le toatele o auauna ma Faifeau o le ekalesia e pei ona tautino ai le toatele o le Aufaigaluega ina ua feiloai ma le Samoa Times.
O ia meaalofa sa toe faafoi ane, ma fai mo latou sao e fesoasoani atili ai i le auga ma le sini autu o le faamoemoe o Taitai, a o faagasolo ai polokalame uma o le mafutaga e pei ona molimauina e le toatele o Faifeau. Sa faamaonia mai e se tasi o faafeagaiga o le ekalesia, le susuga ia Pastor Tuilagi Fesalaiai Paeu Meke Leilua e faapea, na ta‘ape le mafutaga ma le tele o faalumaga faaleagaga sa auala esese mai i auauna a le Atua sa nafa ma aoaoga ma saunoaga faapitoa.
O atunuu e pei o Samoa, Amerika Samoa, Tokelau, Fiti, Niu Sila, Ausetalia, Initia, Pakisitani, Hawaii, Alaska, Amerika, sa faapea ona auai uma. I saunoaga a le toatele o faifeau sa auai i lea mafutaga, sa ta‘ua ai foi le tulaga o le faatoateleina o tagata ua faakerisianoina i le galuega a le Worship Centre i atunuu i fafo, aemaise lava atunuu faigata e pei o Initia, Pakisitani, ma isi, e tusa ai ma ata ma vaaiga sa faaalia i aso o le mafutaga, aemaise ai o molimau ma tautinoga a Auauna a le Atua o loo galulue ai i ia atunuu.
O nisi o vaaiga matuia ma le matautia tele i atunuu i fafo e pei o Initia, o le lamatia lea o soifua o Faifeau ma le Aufaigaluega a le Atua ma le auuso Kerisiano, ona o tu ma aga faapaupau, atoa ai ma isi ituaiga talitonuga, e tetee i le aoaoga faakerisiano.O sauaga e matuā mamafa tele, ma o nisi o auauna ma tagata Kerisiano, na oo lava ina fasiotia ma tagatavaleina, ona o le mau ma le Talalelei folafola.
Sa faamaonia mai e se tasi o alii Faievagelia Pastor Apisahek, o loo galue ai i totonu o Initia, ma o ia foi o se tagatānuu o Initia, e faapea e ui ina mamafa sauaga mo i latou, peitai o loo vaaia pea le matuā galue malosi ane o le Atua i le galuega o loo taumafai i ai. Sa ia ta‘ua i se talanoaga faapitoa ma le Samoa Times e faapea, e sili atu i le 50,000 tagata e faaolaina ma talia le aoaoga Kerisiano i le aso e tasi.
Sa ia faamaonia mai e tusa ma le 2.9 pasene o tagata Initia ua faaolaina ma faakerisianoina i le taimi nei, ma o loo tele pea se galuega e fia faia mo lona atunuu. Sa ia ta‘ua i lana molimau se ata manino lea, o loo atili faamalosia ai pea i latou e faaauau le tala‘iga e ala i sauniga tetele i nofoaga faitele, ma o se auala vave tele lea ua mafai ona faatamoe ai le finagalo o le Atua i tagata taitoatasi ma tagatānuu o Initia lava latou.
O le tapenaina foi o ia sauniga tetele e lē faigofie, auā e ao foi ona matuā malu puipuia Failauga ma Faifeau e laugaina le Afioga a le Atua, mai faiga faaterolisi, ma sauaga masani mo le au Kerisiano.
Sa faafetaia tele foi e lea Faifeau Fai Evagelia mai Initia, le sao o ona uso a Faifeau Samoa a le Worship Centre, e pei o le susuga ia Pastor Viliamu Mafoe ma isi sa autovaa atu ma fesoasoani i le taumafaiga o le galuega i lo latou atunuu.
E lē gata i le itu faaleagaga, ae ua faapea foi nisi o fesoasoani tau seleni ua mafai ona ofoina atu e Faifeau Samoa e lagolago i le itu i le tino o le galuega, ma o ia foi seleni ua lē faavaitaimi, a ua fai ma taulaga faifai pea mo i latou i tausaga uma.
O le Aso Sa o le vaiaso nei o le a toe taliu ai Pastor Apisahek i lona atunuu i Initia, pe a mae‘a se sauniga o le a ia laugaina ai le Afioga a le Atua i le ekalesia Worship Centre i Otahuhu i Aukilani, le susuga ia Pastor Sepi Paulo ma le faletua ia Zoe Paulo. O lea foi sauniga o loo valaauina ai soo se tasi lava e fia auai ma molimauina meaalofa a le Atua o loo faaaogāina ai lea foi auauna.
O le mafutaga o lenei tausaga, sa lē faapitoa mo ekalesia Samoa, peitai mo isi atunuu uma, lanu ma gagana o loo galulue i lalo o le faamalu a le Worship Centre. O le susuga ia Pastor Viliamu Mafoe ma le faletua ia Lavina, o i laua ia o loo avea ma Taitai o le galuega i le atunuu i Samoa faapea le lalolagi atoa.
O le susuga foi ia Pastor Viliamu, ua faaee atu nei i ai se tasi o Tofiga maualuga o le ekalesia, ma ua avea ai ma Aposetolo e pei ona sa faamaonia mai e Pastor Tuilagi. O le tele foi o nisi atunuu e pei ona ta‘ua i luga, o loo ua agai i ai le galuega, ma ua faatutūina ai foi ekalesia Samoa.
