Taamilosaga voli a le Logan City Slammers Volleyball Association

O le tele o aiga, mafutaga, ekalesia ma asosi, ua faapea ona avea lava le aso malolo o Ausetalia ma aso faapitoa e faataunuuina ai o latou faamoemoe, e ala lea i tafaoga ma taaloga.

O le Aso Gafua, aso 26 o Ianuari  sa atofaina e faia ai se taamilosaga volipolo tele, lea sa auai uma ‘au e 10.

E 4 ‘au a tama ma ‘au a teine e 6.

O le tausaga muamua lenei ua itiiti ai ‘au o le taamilosaga ona o le tele o nisi ekalesia sa usuia fonotaga i Samoa, e fai ane la le taamilosaga e lei taliu mai faigamalaga.

O lenei taamilosaga e taitasi i le tausaga ma faia, na amata faavaeina mai i le tausaga e 2007, ma ua faaigoaina o le Logan City Slammers Volleyball Association. O le tofā ia Le‘aula Mose Tanielu mai Lalovaea ma Saleaula i Savaii o le Peresitene lea.

O le sui peresitene o le susuga ia Tenise mai Leauvaa, Failautusi o le tausi ia Orepa Tanielu (Auala i Savaii) ma Matele Malaetai mai Leauvaa o ia lea o loo nafa ma le teuina o oloa poo seleni a le asosi.

Sa mataina le finafinau o ‘au uma sa tauva, ma o le ‘au a tamaitai Leauvaa sa tulai mai i le manumalo, o se tasi lenei o ‘au e malolosi tamaitai uma, e faamanuiaina lava talu ona faagasolo mai lenei taamilosaga.

Na tulai mai le South West i le tulaga lua ae o le ‘au a tamaitai mai le mafutaga a le Aiga Samoa i Matu sa tulaga tolu faasolo atu ai agai i lalo.

O ‘au a alii na manumalo le Island Mix, tulaga lua le ‘au a Saina, tulaga tolu le ‘au a Logan City.

O tulaga togia lava na maua latou faaailoga tupe ma talita.

Sa momoli le agaga faafetai o le Peresitene ma le Komiti i ‘au uma sa tauva faapea le ‘au tapuai sa faapea ona faatumulia ai le lotoā a le aoga a Logan.

E lē sili lava le ta‘i i lo le tapuai, auā ua a‘e manuia le faamoemoe e pei ona tapena mai i le tausaga atoa ona o le mamalu a tapuaiga a nai mātua faapea le mamalu o le atunuu.

Faamoemoe foi i le alofa o le Atua ina ia solosolo lelei le alo atu o le Logan City Slammers Volleyball Association mo a latou fuafuaga faagasolo o lenei foi tausaga.