Ole Aso Toonai na tuanai atu na faataunuuina ai le taamilosaga lakapi pa‘i (touch rugby) a tupulaga Samoa ile pitonuu o St Albans ile aai o Melepone. Ose aso matagofie ile susulu ole lā na mafanafana ai le aso mai le malulu ole savili, a‘o gasolo atu nai o latou tauaiga, uo ma Samoa e nopiai lata ane e maimoaina lo latou faamoemoe. Na amata le taamilosaga ile solo a ‘au e fā na vaevaeina iai le taamilosaga, ole ‘au a Samoa, Fiti, Niu Sila ma Ausetalia.
Na saunoa se tasi ole komiti na faafoeina le faamoemoe le susuga ia Telemeke Kalepo, o lenei taamilosaga ose fuafuaga sa fauao faupo ina ia faalautele ma faatāuaina ai soifuaga o nisi o nei alo ma fanau talavou ale atunuu mai soifuaga o soifua ma ola ai.
E lē gata i lea ole tapue ai o ola o nisi o fanau e lē o mautonu pe maua se sootaga ma aiga, ekalesia ma mātua. Ua tele masina o fai pea taaloga faasamasamanoa i afiafi taitasi, ma vaaia le faatupulaia ole toatele ole tupulaga e agai atu ma fiafia e taaalo ma faaafu faatasi ai.
O lea na a‘e ai se manatu mole faamoemoe e pei ona faataunuuina ile Aso Toonai. Na faatau lava ele tagata lona ofu taalo ile lanu a lona atunuu ua tofi iai, ae na lolomi faatasi e pei ona sa matagofie ma felanulanuai ile malae.
Na mae‘a le solo mālie a ‘au i luma ole fale matamata sa afifio ai le Aufaigaluega tainane le tapuaiga a tupu ma tamalii ole atunuu. Na saunoa faafeagaiga i upu timai ma apoapoai ma tatalo faamanuia atu mole alofaiva ile faagatama. Na saunoa faafetai le faatamā ole taamilosaga le fetalaiga ia Sa‘u Faitala Tagoa‘i, ma amataina ai loa taaloga, na faamalieina finagalo ole aumaimoa i uiga mālie male tausaafia ole toatele o nei tupulaga, aemaise ole gagana faaaloalo sa maitauina.
Ole iuga la ole taamilosaga na sola le ‘au a Fiti male talita ole uluai tausaga, ina ua malolo ai le ‘au malosi a Niu Sila, tulaga tolu Samoa ae ui ina tulaga fā Ausetalia, ae na sola male faailoga ole togiga manaia, ole au maopoopo na maua e Samoa, tama taalo junior ole taamilosaga na maua e Sione Tuputala, ae ole tama taalo sinia na maua e Jimmy.
Saunoa le susuga ia Telemeke ua iai le faamoemoe mo se aso mo aiga a‘o lei oo ile Kirisimasi e valaaulia uma ai aiga o tupulaga nei e fiafia faatasi ai. Na maau le komiti male faatamā i faaaloaloga mole aufaigaluega ma faamae‘aina ai ile tatalo.
O sui ole komiti ole faatamā o Sa‘u Faitala Tagoa‘i, Telemeke Kalepo, Moemei Fuatai ma Fifita Maagiagi, ma faafeagaiga sa fai ma faamasino o Pastor Tanielu Atioo, Pastor Uiga Smith ma Pastor Atapana Poe.
