E lua aso na faagasolo ai le liki kirikiti faasamoa moni a le Toe Afua se Taeao, lea na faia i le aso muamua ma le aso lona lua o Ianuari o le tausaga nei 2015.
Na muai sii mea i Matautu Sa e ala i le viiga siitia sa saunia e Bishop Nai Tavita ona faagasolo loa lea o le taamilosaga. E fā ‘au sa tauva e aofia ai le Aso Fiafia poo le Happy Days, Sega‘ula, Vaa o Manu ma le Red Bank Boys. O ‘au e tolu a kalapu se‘i vaganā ai le ‘au a le Vaa o Manu o le au a le Ekalesia Metotisi. Na taaalo muamua le Sega‘ula ma le Red Bank Boys manumalo le Sega‘ula. Lona lua o le Aso Fiafia ma le Vaa o Manu manumalo le Aso Fiafia. Taaloga lona tolu na taaalo ai le Aso Fiafia ma le Red Bank Boys manumalo le Aso Fiafia. Taaloga lona fā o le Sega‘ula ma le Vaa o Manu, manumalo le Sega‘ula.
O le taaloga lona lima o le Vaa o Manu ma le Red Bank Boys, manumalo le Vaa o Manu. O le suega siamupini na fetaui ai le Aso Fiafia ma le Sega‘ula manumalo le Aso Fiafia. O le siamupini o le kirikiti faasamoa moni a le Toe Afua se Taeao 2015, na sola ma le (1) Aso Fiafia na maua le $2000.00 ma le ipu. (2) Sega‘ula na maua le $1000.00 ma le ipu. (3) Vaa o Manu maua le $500 ma le ipu. (4) Redbank Boys na maua le latou teutusi.
O le susuga ia Faamoana Collins o ia o le kapeteni o le Aso Fiafia lea na siamupini ae na ia mauaina le ipu ma le teutusi i le liki a Melepone ona o le kapeteni tausaafia, o i latou foi na omai ma le tulaga lua o le liki a Melepone lea sa faafoeina e le ekalesia.
O le afioga ia Lemalu Apelu (Faleaseela Lefaga) na ia mauaina le ‘ai silia e 45 ‘ai i le taaloga e tasi. O ‘olo silia e 9 ‘olo i le taaloga e tasi na mauaina e Lipine Faanana mai Satupaitea. O le Peresetene oTelei‘ai Toa Matau‘aina.
O le Faatamā o le tofa ia Samoata Peleti Lemalu faatasi ai ma le komiti. Sa faafofoga le aofia i le tolaulauina o ‘ai ma nisi vaega i le paka e ala i siufofoga o le susuga ia Lesa Tulifau ma le susuga ia Faleauto Tufi Lauama Siligi. Na saunoa faafetai le Faatamā e faafetaia ai ‘au sa tauva, faaiuina i se tatalo e le tausi matagaluega o le Ekalesia Metotisi susuga ia Rev Moloka e faafoi le viiga o le Atua ua tau ai lau o le faamoemoe ma tatala ai lava le filialii.
