Masalo o le tasi lenei o taamilosaga o loo tapena i tausaga taitasi e faatinoina ai nisi o fuafuaga i le faagasoloina ai lea o le taaloga lenei o le “Touch Tag Tournament”.
E foliga mai o le isi lea faatinoga fou i le faatinoina o le taaloga lenei o le “Touch”, e tusa ai ma se feiloaiga ma le susuga ia Nuualuga Uale mai le Ekalesia Kingdom Uso.
Na ia ta‘ua ai e faapea o le auga tonu lava o lenei taamilosaga o le aoaoina lea e tauala atu i taaloga se fesoasoani, aemaise lava ia i latou e fiafia i le laulauvavale i upu masoā, upu sā poo upu palauvale i taimi o taaloga.
Ua toatele tupulaga i nei ona po ua pa‘ūū i vaivaiga ia ua tele ina vaivai ai ma faia‘ina ai ma toe faalumaina ai, ae o loo faatāuaina i lenei taamilosaga le auai i taaloga ae ia silafia taiala e ao ona tausisia e pei la o nisi o vaega ia na ta‘ua e aafia ai “upu Sa’ “palalauvale” ma le faatupu misa, faatupu vevesi.
Na ta‘ua foi e Nuu le tulaga o loo lē foi ai le Komiti o nei taamilosaga ia faamalosia ma saga faamalosia ia tulaga i tausaga taitasi. O lea ua savalia nei le lima o tausaga o faagasoloina lenei taamilosaga, ma o se vaaiga faafiafia loto le taupati mai o le tupulaga talavou e fiafia i lenei taaloga.
O se taaloga foi sa iloiloina ma le toto‘a i ai le silasila a le komiti, ona e vaaia le fiafia i ai o le toatele o tupulaga talavou, e 16 Au sa resitaraina mo le taamilosaga o lenei tausaga.
E valu ‘au mai le tausaga talu ai, ae valu foi ‘au fou sa maua le avanoa e ofi mai ai i le taamilosaga o lenei tausaga, ona faasafuaina loa lea i Pools A, Pools B, Pools C, ma Pools D sa faatautaia ai lea taamilosaga matagofie.
E taunuu atu le tusitala i lea taeao o loo toulu nai timuga māmā ae ua matuai le sao se taavale i le malae autu sa faafoeina ai nei taaloga. Na molimauina e le pulega o loo latou faafoeina lelei taamilosaga le faamanatu pea i ‘au vaega e ao ona mulimuli taia poo le talia o se faaiuga e ono tuuina atu e le komiti o le taamilosaga i ni vaega faaletonu e maitauina ua talafeagai ona faamaloloina ai se tagata taalo poo se ‘au taaalo foi.
O le toatele lava foi o ‘au e mai totonu o Ekalesia, o se tasi lea vaega aogā ma le tāua o le malamalama o le Faifeau i le Au lea o le a auai ai i le taamilosaga, aemaise sui auai, e maua ai foi ma le latou mafutaga vavalalata.
Na saunia faailoga mo le tagata taalo laitiiti sa auai, ‘Au Siamupini o le taamilosaga, tagata taalo o le taamilosaga, aemaise le ‘Au pulea lelei i le vaavaai a le Komiti mai lava i le amataga o le taunuu atu i le malae, lotu taeao, ma le pulea lelei i le aso atoa toe maopopo lelei.
O se tasi o vaega na ta‘ua foi e Nuu Uale e faapea, o le isi vaega sa faatāuaina e le Komiti o le taamilosaga o le aua lea le faalagolago i Sponsors mo le faatupeina o le taamilosaga ae tagai lava i lima e maua lelei ai le lagona naunau e faia se mea lelei e aunoa ma le faalagolago i fesoasoani mai fafo, o se tasi lea faataitaiga lelei o le tagi i lima, faatigaina oe lava e saili se mea lelei.
E lē taumateina le agaigai pea i luma o lenei faamoemoe i lalo o le talitonuga o loo faalagolago ma faatautaia i taiala o le Talalelei, ma le tāua o le galulue faatasi ma le taitai o se galuega, ekalesia ma mafutaga.
