O le faaiuga o le vaiaso talu ai o le Eseta, 23 Aperila 2011, na faataunuuina ai i le laumua i Melepone Ausetalia le taamilosaga o le taitoafitu a le ‘Melbourne Easter 7s.’
O lenei taamilosaga, na faafoeina e le ‘Melbourne Samoa Sports Academy Inc’, sa faaigoa muamua o le ‘Melbourne Manu Samoa Rugby Development and Recruitment.’
Ua lua tausaga sosoo o faafoeina pea lenei tautua. O le sini autū o le taamilosaga, o se auaunaga mo le atina‘eina o alo ma fanau a Samoa o loo fiafia i le lakapi i totonu o Melepone.
O nisi itu na ta‘ua e le tofa ia Matamua Fainuulelei Filipo Saena, sa nafa ma le faafoeina o le taamilosaga, o le faaaogā lea o le lakapi e fesootai ai komiuniti (community) ma alo ma fanau a Samoa, ua afaina i le tele o taa‘ina faaneionapo ua aafia ai fanau a Samoa i le tulafono.
O se fesoasoani atu foi lea i le Iuni lakapi a Samoa aemaise ai foi Victoria Rugby Union (VRU), auā a latou polokalame atia‘e mo le Manu Samoa, aemaise le lumanai taaalo a alo ma fanau o Samoa o loo aumau i Melepone, e fia tautua foi mo Ausetalia.
E sefuluono ‘au o le taamilosaga na tausinio, e aofia ai ‘au a kalapu i totonu o le Iuni lakapi a Vitolia (Victoria), ‘au a faalapotopotoga, ‘au a komiuniti a Rarotoga, Niue, Maori, Fiti, ma ‘au a nuu ma alalafaga o loo maopoopo i totonu o le laumua. E tasi le ‘au mai Newcastle, i le setete o NSW sa auai.
Sa pueina lenei faamoemoe e le kamupani TV tele i Ausetalia, le ABC Australia Network, lea e tele ina alu a latou polokalame TV i Niu Sila, Amerika, Samoa, Tonga ma Fiti, ma le tele o atunuu o le Pasefika.
O loo faamoemoe le ABC, e faasalalauina faapitoa ata o le taamilosaga i le latou polokame o le TV ma le Internet i se taimi e lē o toe mamao.
Na amata le pueina o polokalame a le TV i le taeao o le Aso Toonai o le taamilosaga, i le 8.00am, i le ava o le feiloaiga sa fai i le kalapu lakapi a Box Hill Rugby Club lea na lagolago malosi i le faamoemoe. O le ava o le feiloaiga sa faafeiloai ai malo faaaloalogia ma ‘au o le taamilosaga e pei o aganuu masani Faasamoa.
O nisi o tamā o le atunuu sa auai atu e lagolagoina malosi le faamoemoe, o le susuga i le faafeagaiga ia Rev Aviti Etuale mai le Ekalesia EFKS i Northcote, le susuga i le faafeagaiga toeaina ia Rev Faiumu Matafai Pio Faletuai, ma le susuga i le faafeagaiga ia Rev Moe Tauti mai le EFKS i Cranbourne. O le fofoga o le aso, o le susuga i le A‘oa‘o mai le EFKS i Cranbourne, le tofa ia Ape Leulumoega Sofara.
Na mae‘a le ‘ava ona sosoo lea ma le usuina o vii o Ausetalia ma Samoa, e se tasi o tama pese lauiloa i Niu Sila ma Samoa i luga o TV ma upega tafailagi, le susuga ia Lemuel Misa, sa tauva ma ia ausia foi le Top 10 a le NZ Idol. Na maofa le toatele i le siufofoga matagofie o Lemuel Misa.
O le taitai o le pulega a le matagaluega EFKS i Melepone, le susuga ia Rev Aviti Etuale na saunia le tatalo faamanuia e amata ai le taamilosaga o le 2011, ina ua mae‘a viiga o le Atua. O le susuga ia Bill Pemberton na fai ma sui o le Whitehorse City Council, na ia kikiina le polo e tatala aloaia ai le taamilosaga.
Ina ua mae‘a taaloga o pulu (pools), na maua ai loa ‘au e valu (8) mo le Cup Quarter Finals, o le siamupini o le 2010, le au malosi a le ‘Fai Ou Vae’ mai Saleimoa, Matāmatagi mai Aleipata, Rosa Paepae mai Nofoalii, South Pacific Chiefs mai Fiti, South Barbarians mai Frankston, Kaiviti Warriors mai Fiti, Leauvaa Vikings mai Leauvaa ma le All Saints mai le EFKS a Dandenong.
Sa maitauina le faigata o Quarter Finals ona o le naunau mai o ‘au uma, ae o inā na iloa ai foi le auro i le afi. Na sao mai ai ‘au e fa: ‘Fai Ou Vae’, South Pacific Chiefs, South Barbarians, ma Leauvaa Vikings mo Semi Finals o le Ipu Autū.
E fai la o le faigata o Quarter Finals, ae na siisii foi i luga le maualuga ua oo atu i ai Semi Finals, auā na faato‘ā mautinoa lava ‘au ua manumalo i le faili mulimuli a o taufao lava taaloga.
Na manatu uma tagata maimoa o le a sao le South Pacific Chiefs i le Final, ae e lei faavaivai ai foi le ‘Fai Ou Vae’, ina ua sosoo a latou sikoa e lua ma toe manumalo ai.
Sa faapea foi le taaloga a le South Barbarians ma Leauvaa Vikings, ona o le malosi o Leauvaa Vikings i le amataga, ae o le toe faatamala lava i le ‘afa mulimuli, na toe maua ai le avanoa o le alii o Elisara Sua ma lana ‘au, ma manumalo ai le South Barbarians.
Na tulai mai o ‘au pito sili ona lelei e sue ai le Final ma le siamupini o le Ipu Autū 2011, o le ‘Fai Ou Vae’ ma le ‘au fou o le taamilosaga, le South Barbarians.
Sa matuā matagofie le Final i le maimoa ona o le taufai tutusa o ‘au e lua, toe naunau i le fia manumalo, ae peitai na toe manumalo foi le ‘Fai Ou Vae’ ia South Barbarians (silasila i iuga o taaloga).
E lei faigofie le manumalo a le ‘Fai Ou Vae’, auā sa malosi mai foi le South Barbarians, ona o le toatele o nei alii e taaalo faatasi uma i le kalapu a Southern Districts, se kalapu malosi i Melepone, ae faiaoga ai tamalii foi Samoa o Tagaloa Tom Tusitala ma lona uso o Tupai Peau Tusitala.
O le au a le ‘Fai Ou Vae’, sa faiaoga ai le alii o Ike Vailoaloa, ae faamaoopoopo e le tamā matua ia Muliagatele Natu Ioane, le tuaa o le uigi saoasaoa a le Wallaby a Ausetalia, o Digby Ioane.
O le ‘au foi lenei sa siamupini i le 2010, lona uiga ua lua tausaga sosoo o manumalo pea le ‘Fai Ou Vae’.
O nisi itu mataina o le taamilosaga, sa sue ai foi poo ai le tama taalo e pito sili ona saoasaoa.
E tofu le ‘au latou ma le latou sui saoasaoa, ae na faaiuina le tuuga i le avea o le uigi a le Victory Eagles, le alii o Noa Noa, ma tama taalo aupito sili ona saoasaoa (fastest player).
Na faaalia le agaga faafetai o le afioga i le peresitene o le asosi le susuga i le faafeagaiga ia Asi Luaei Ioelu Siaoloa, ona o le lagolagoina malosi o le taamilosaga e susuga i faafeagaiga ma ekalesia eseese, faapena foi le asosi laufali ma le Iuni Lakapi a Vitolia, ona sa mafai ona auai mai le Director o le VRU ma le Rebels, aemaise o le Taitai o le lakapi a le Pasefika i Melepone, toe iai i totonu o le Board a le VRU, le tamaitai o Ema Yandall.
O lana faafetai faapitoa i le Iuni Lakapi a Samoa, ona ua mafai ona auai faapitoa ma fai ma malo faaaloalogia, le faiaoga o le Manu Samoa, le afioga i le Gafatasi ia Fuimaono Titimaea Tafua, o le alo faasino i le Tui-Atua Faanofonofo.
E faapena foi lona agaga faafetai i le Whitehorse City Council, ma le peresitene o le kalapu a Box Hill Rugby Club, le susuga ia Tony Laycock ma le latou kalapu, sa faipaaga ma le Melbourne Samoa Sports i le faataunuuina o lenei faamoemoe. Sa faafetai foi le susuga i le toeaina, i le lagolago faapitoa a le Pasefika Dance Group sa faafiafiaina le aumaimoa e vavae ai foi foe.
E lei mafai ona auai le afioga i le Komesina Sili o Samoa i Ausetalia, le afioga ia Lemalu Samau Tate Simi, ona o ni ona tuatuagia faaleaiga ae na momoli mai lava lana feau faamalosi mo le asosi, auā le tapuaiga a Samoa.
Na maitauina foi le lagolagoina o le taamilosaga, e nisi o tamalii o le atunuu e pei o le tofa ia Leituala Sam Maota, ua loa lana tautua i le lakapi, ona sa avea ma peresitene o le Melbourne Samoa i le tele o tausaga ua mavae.
E faapena foi le lagolago mai o le tele o nisi kamupani, e pei o Siavalua Freights, aemaise le alo pese lauiloa o Samoa, o Lemuel Misa.
Na faaiu le taamilosaga i le tufatufaina o faailoga i lea lava po. O le susuga i le faiaoga o le Manu Samoa, Fuimaono Titimaea Tafua sa tauaaoina atu faailoga i lea po. O le susuga ia Danny Maiava, o le taitai o le Australian Samoa Rugby, sa ia tauaaoina atu nisi faailoga.
Ua manino mai foi le faaalia o finagalo o nisi o tamalii fai lakapi i isi setete o Ausetalia, ua latou mananao e auai mai i le taamilosaga o le tausaga fou, ona ua talitonu ma faamaonia, o se taamilosaga o le a fai pea i tausaga uma, ma e talitonu o le a ese foi se tulai mai i le 2012, pe a maua pea le ola ma le malosi mai le Atua.
