O le Aso Gafua nei, 21 o Ianuari sa feagai ai le valu o Ekalesia tuufaatasi ma aso o taaloga mo le tupulaga ma soo se tasi e fia mafuta i ai.
E tele ituaiga taaloga sa filifilia e le komiti o le Falevalu e taaalo ai le tupulaga ma faamasani atili ai le mafuta fealofani o ekalesia uma, amata mai tamaiti e oo lava i ē matutua.
Manaia le vaaia o le fefiloi o ‘au eseese. O lanu ua faaaogāina e iloa ai lea ‘au ma lea ‘au i lakapi, volley polo, netipolo, soka, tosogamaea, taufetuliga, ma taaloga e tele.
Ua faamoemoe le Ekalesia Tuufaatasi (Falevalu) ina ia faatumauina le nofo fealofani o tupulaga ma tagata lotu uma i soo se mafutaga e tuufaatasia ai.
Na mae‘a foi ona latou tuufaatasi e faatino se sauniga lotu na faailogaina ai le Kirisimasi i le masina o Tesema.
O viiga o le Atua atoa ma faaevagelia ma pese eseese na faamanatuina ai le soifua mai o le Perenise o le Lagi.
