Taaloga tuufaatasi Matagaluega EFKS

O se aso matagofie i le felanulanuai o tapenapenaga a autalavou eseese mai

Pulega tetele e 3 o loo aofia i le Matagaluega a le EFKS i Kuiniselani.

O se taeao toto‘a ma le manino, o se aso lagilelei foi i le susulu manaia o ave o le lā, le Aso Toonai na tea nei, le aso 6 o Novema, lea na faataunuuna ai taaloga a Autalavou uma a le Matagaluega mo lenei foi tausaga.

Sa tatalaina i le sauniga e tapasaina ai lea aso, sa taitaia e le Toeaina Taitaifono o le Matagaluega, susuga Rev Lauie Lupematasila, ona sosoo ai lea ma le saunoaga faaleagaga autū o le aso, na saunoa i ai le Komiti o aoaoga Kerisiano a le Ekalesia, susuga i le toeaina ia Rev Tauaaga Mataafa.

O mafaufauga o tamā o le Matagaluega ina ia faaauauina pea taaloga ma polokalame faa-Evagelia faapea siva ma polokalame faaleaganuu, ina ia avea ma ala e faaosofia ai le fiafia ma tau tatai mai ai tupulaga e fefaamasaniai, ae o se avanoa tatau foi lea mo le Ekalesia e faaulufale atu ai a‘oa‘oga faaleagaga mo ana fanau.

Sa na o le 3 ni taaloga sa agai i ai fiafiaga o lea aso, ma sa mamafa i lakapi pa‘i mo le fanau, ona taualuga lea i tosogamaea ma tuugataga aemaise le pati ma le po i faigasiva.

Sa maualuga le agaga faafetai i le Atua i lea aso, ona o nisi o alo ma fanau a le Matagaluega ua faamanuiaina i taaloga i lenei tausaga.

O Chris Fea‘ua‘i Sautia mai le Pulega Saute ua faamanuiaina i le Aulakapi a Tamaiti Aoga Ausetalia i lenei tausaga.

O Lama Tasi mai le Pulega Sisifo ua filifilia i le Junior Kiwis i lenei tausaga.

O Iosua Taefu Lui mai le Pulega Matu o loo taalo nei i le Aulakapi a le Broncos.

O ia ala eseese ua faaaogāina nei ina ia avea ma ala e momoli ai ma feau faaleagaga i fanau.

Sa faatumulia lea aso i mātua na milo faatasi ma a latou fanau i nei taaloga ona o le agaga fiafia e faamaopoopo.

Na mae‘a ona faaiu lea i le toe samalaina o lea lava feau i saunoaga faaiu o le aso e pei ona saunoa i ai le Peresitene o Autalavou a le Matagaluega, le susuga i le faafeagaiga ia Rev Lance Tautiepa, faapea se upu faamalosi sa saunoa faaiu i ai le Komiti Faatonu, le toeaina ia Rev Kerita Reupena.

Ua fuafuaina nei le toe feiloai o le Matagaluega i le aso 5 o Tesema mo polokalame o le Kerisimasi ma faaiu ai loa ana polokalame mo Autalavou o lenei tausaga.