Ua masani le faalogo i upu e masani ai, ‘e afua mai mauga le manuia o se nuu’, a maopopo aiga, ua lelei Ekalesia, fealofani se Nuu ma manuia Malo.
O le amataga foi lea o se mafutaga faaleaiga e masani ai le auaiga o Paea i Aukilani nei i tausaga taitasi, i taaloga tuufaatasi sa faataunuuina i Totara Park, Manurewa i le Aso Toonai o le faaiuga o le vaiaso.
O se faatasiga e masani ai i le vaitau lenei o le amataga o le tausaga, a o feagai pea le fanau aoga ma malologa, lea ua silia ma le sefulu tausaga talu ona faia.
O le naunautaiga lava ia faaauau pea le mafutaga ma maopoopo aiga, auā e pei ona masani ai le toatele, e faatoa potopoto lava i fonotaga ma faatasiga ona o se talanoaga i ni faalavelave, peitai e seasea lava maua ni taimi e taaalo ai ma fiafia faatasi e pei ona iai lenei mafutaga mafanafana.
O se faataitaiga lelei tele lea mo le fanau ma tupulaga fai a‘e, ma o le a aveaveai ai lava ma faaauau ai pea lea mafutaga. Na tatala aloaia lava taaloga i se faigalotu puupuu ma faagasolo ai polokalame o le aso.
O taaloga e aofia ai tuuga taga, sapoga fuamoa, tosoga maea, o le lape ma nisi, o taaloga e aga mālie le faatinoga, ua na o le ‘ata lava ma ua faaosofia ai le fia auai o le au matutua ma ua laugatasia uma, leai se tasi na toe nofonofo, ae totofi lava le paga a le toeaina ma le loomatua ia, ae sapo le fuamoa ma taaalo faatasi ma le fanau.
Ua toe fafagu mai le olaga sa amata mai ai i si o tatou atunuu a o ola ma aumau i Samoa, i ituaiga taaloga faapenei le aga mālie. E fai o le alu a tagata matutua ma le tupulaga, ae o le lē faatafa foi o le tosoga maea a le fanau laiti.
E silia ma le onosefulu i latou na auai, o le auuso ma tuafāfine ma a latou fanau, faapea fanau a latou fanau, o se aiga toatele. Molimauina le matagofie o se aiga ae fealofani ma fiafia faatasi faapenei, leitioa a saafi le faisalamo o Tavita, ‘Se mea ina a lelei o uso ae nonofo faatasi’.
Na mae‘a nisi o taaloga, ona vavae lea o foe mo sina faamalositino i se taumafataga o le aoauli, a o lei toe amata le ‘afa mulimuli o taaloga ma taualuga ai le aso taalo i lakapi ma nisi taaloga a le fanau a o lei faamatafi i se tatalo faaiu ma tatala ai le fili alii, faamavae ma faatofa.
E faamoemoe o le a toe faia foi lenei faatasiga i le taimi lava lenei, pe a pule alofa le Atua e aulia le tausaga fou.
