Ua vaaia le tumutumu o le taulaga o Apia ma ona talafatai ona o le faagasolo ai o taaloga a Tupulaga o Malo o le Taupulega lea o loo talimalo ai Samoa i lenei vaiaso.
O taaloga lona lima ia ua faatautaia i le lalolagi ma o le uluai taimi lenei ua talimalo ai se atunuu o lenei itulagi e aofia ai foi Niu Sila ma Ausetalia, ma o se taumafaiga tele ua manatu le malo o Samoa ua mafai e Samoa ona faatino.
E felanulanuai fu‘a e silia i le 60 o atunuu o loo tausinio a latou au taaalo i Samoa i le taimi o le sauniga e tatala ai lenei faamoemoe. O atunuu o Aferika, le atu Karepiane, Europa, Asia ma Initia atoa ai ma atunuu o le Pasefika ma o atunuu uma nei e aofia ai foi Niu Sila ma Ausetalia sa i lalo uma o le vaaiga a Peretania i tausaga ua mavae lea ua ta‘ua o le lio o Malo o le Taupulega. Na faafeiloai e le Alii Palemia le tumutumu o le Apia Park i lea sauniga ina ua mae‘a le sauniga lotu na fofogaina e le susuga i le faafeagaiga ia Rev Nuuausala Siaosi ma viiga matagofie na saunia e le Kolisi o Uesele.
Faaalia e le alii Palemia le faafetai i le anoano ua malaga mai i Samoa mo taaloga. O i latou ia e amata atu i le 14 tausaga seia oo i le 18 tausaga le matutua ma ua tufa i faletalimalo o le atunuu faapea ai ma le kolisi o Samoa i Vaivase atoa ai le Kolisi o Pesega a le Ekalesia a Iesu Keriso o le Au Paia o Aso e Gata ai, o nofoaga nei ua faamautu ai au taaalo, ua iai ma fale mo taumafataga a au eseese atoa ai le falemai i nofoaga uma nei auā lava le puipuiga ma le saogalemu o tagata taaalo.
O taumafa ua faaalia e au taaalo le lelei atoatoa ma na o latou faafetaia le fesuisuiai o aiga ma ua faasolo atoa foi lava le tatala o fale nei mo taumafataga ma o se tulaga lea ua ese ai lava taligamalo i Samoa nei ma isi faatasiga tetele faapea i isi atunuu.
E silia ma le 500 taavale a le malo ma taavale la‘u pasese ua vali ma teu uma mo le feaveaiga o au taaalo ma o Tuanaimato ua faamautu ai le ofisa tele mo le tali atu i manaoga o au taaalo.
O fale taalo i Tuanaimato atoa ai ma le malae taalo o le Apia Park ia ua faagasolo ai taaloga e pei ona amata lava e Afeleti i le aso ananafi taaloga. O siisiiga uamea mamafa na faagasolo foi ananafi ma faipelega anapo, atoa ai ma tenisi, o le faatavale polo na faia foi i le Apia Park.
E faitau selau fanau aoga na faafiafia i le tatala aloaia o taaloga ma o lana afioga mamalu i le Ao o le Malo o Samoa lea na faalauiloaina le tatalaga o taaloga.
E iva taaloga ua fai i ai tausinioga i lenei vaiaso ae e to‘a 904 alii ma tamaitai talavou ua tausinio ai. O isi taaloga e pei o le aau, o le squash, o le fana fana aū ua faaopoopo i le lakapi taitoafitu a tamaitai ma alii ma ua vaaia i afeleti le malosi o ‘au mai Aferika faapea ai ma le Karepiane.
O ‘au e pei o Peretania, Kanata, Ausetalia ma Niu Sila o lea o loo fai le tausinioga i tuuga aau ma le tenisi ma e faigata tele i au a atumotu o le Pasefika ona taumafai atu i le malolosi o ‘au nei e pei ona ta‘ua.
Ua faamanatu faatasi le vaiaso o le Teuila ma le vaiaso o taaloga ma ua tumutumu Apia ia i latou ua i le atunuu mo lenei faamoemoe ona o loo maua le avanoa i afiafi e agai ane ai i latou o loo tausinio e maimoa i le tulaga ua iai faaaliga o tu ma aganuu faa-Samoa.
O le faanaunautaiga o le Malo e pei ona saunoa i ai le alii Palemia ina ia avea nei taaloga ma auala e faalauiloa atili ai Samoa i nei mau atunuu o Malo o le Taupulega a o iai i Samoa nei.
