Ua faamaonia nei e le Iuni a le Lakapi Liki a le Pasefika le faia lea o le taaloga faavaomalo a Samoa ma Fiti i Apia. O le aso o lenei uluai taaloga i Samoa o le aso 8 o Oketopa. Ua tapena lea mo le vaiaso e sosoo ai ma le taaloga faaiu a le NRL i le aso 1 Oketopa.
O lenei faaaliga na faailoa a o loma le taaloga a Samoa ma Toga i le po o le Aso Toonai talu ai, ma o se tulaga matautia lea mo le atinaeina o le taaloga i totonu o le atunuu.
I le saunoaga a le taitaifono a le Lakapi Liki a Samoa, le afioga Tagaloa Faafouina Su‘a na ia ta‘ua ai, “O Samoa o se atunuu e muamua lava ia te ia le lakapi. Ua leva foi ona matou taumafai e fai se taaloga faapenei faavaomalo i Samoa lava. O le maua la o lenei avanoa o se mea matagofie tele, ma o le a lagolagoina e le mamalu o le atunuu.”
Na ia faailoa foi le fiafia tele i le maua o taaloga a le NRL i vaiaso taitasi uma i Samoa i luga o le televise. “O le matamata o matou i taaloga uma a le NRL i vaiaso taitasi ua fai lea ma aupega lelei i le atinaeina o le taaloga i Samoa ma le ‘au a le atunuu, le Toa Samoa.”
O loo iai foi le faamoemoe mo taaloga faavaomalo mo Port Moresby i Papua Niu Kini ma Nuku‘alofa i Toga. E lei faamaonia lea, ae atonu o le taaloga muamua i Apia o se faataitaiga foi lea mo le Pasefika atoa. O nei taumafaiga o le a avea lea ma atinae pito sili ona lelei mo le alualu i luma o le Liki i totonu o le lio a le Pasefika. E o tutusa la nei atinae ma le manaia o taaloga na feagai ma atunuu o le Pasefika i faaiuga o le vaiaso ua tea nei i le va o Samoa ma Toga, ma Papua Niu Kini ma Fiti. O le mataina o taaloga ia ma le toatele o le aumaimoa o se faasino lelei lea mo le tulei atu o taaloga faavaomalo i motu o le Pasefika. Ma o se mea tatau foi. O taaloga uma lava faapenei ua faia uma i totonu o Ausetalia ma Niu Sila.
O le isi polokalame o loo fia fai, o le faateleina lea o taaloga faavaomalo mo Samoa, Fiti, Toga ma Papua Niu Kini. E na o le taitasi taaloga pe o taamilosaga i tausaga taitasi. E lē lava ia taaloga auā le atinaeina o le malolosi o ‘au a atunuu.
Sa faailoa foi le fiafia tele o le NRL i le lelei o taalo a ‘au uma a le Pasefika, aemaise le faasalalauina o taaloga uma i le televise ma maua ai taaloga e manaia tele i le matamata e ese mai i le NRL ma taaloga masani a Niu Sila ma Ausetalia.
O le alu i luma o le malosi o aufili a atu motu, o le malosi tele foi lea o le Lakapi Liki i le Pasefika i Saute aemaise le lalolagi atoa.
Mo le tuleiina la o le taaloga faapea, e iai le faamoemoe o le a faaopoopo taaloga faapitoa mo le Ipu o le Pasefika e faaopoopo i le taamilosaga o loo fai nei. O le Ipu a le Pasefika o le a tauva ai ‘au ia e fā, faatasi ai ma le Atu Kuki ma isi atunuu o loo tau atinae le Liki e iai Vanuatu, Solomona ma Niue.
I le taimi nei o loo maua avanoa atinae mo Papua i le taamilosaga a Intrust Super Cup i Kuiniselani. Ma o le faalogo foi o le a maua ai se avanoa a Fiti e tauva ai i lea taamilosaga i le tausaga fou 2017. O le Intrust Super Cup o se taamilosaga ta‘i vaiaso i totonu o Perisipeni, ma ‘au a kalapu i totonu lava o Kuiniselani.
O isi taumafaiga a le Lakapi Liki mo le faaleleia o le Pasefika o le tulei pea lea mo avanoa e taaalo ai tama o atumotu mo o latou atunuu o loo i kalapu i Peretania. Ae lē gata i lea, o le toe suia lea o le tulafono faavaomalo o loo aafia ai tama taaalo atumotu na taaalo muamua mo Niu Sila ma Ausetalia, ia maua ai se latou avanoa e toe faaauau ai taaloga faavaomalo mo isi atunuu pe a lē toe filifilia i latou e aufili a ia atunuu.
