O le vaiaso talu ai na faamanatuina ai le mae‘a o le totogiina o le aitalafu o le malumalu o le Ekalesia Uniting i Lidcombe o loo galulue ai le susuga ia Rev Sione Eli ma le faletua.
E tusa ma le miliona tala Ausetalia le seleni na togitogiina mo le galuega auā tapuaiga i le Atua i le ono (6) tausaga talu ai ma faatamaia ai loa pepa o lenei nonogatupe tele ua totogi uma.
O le susuga lava i le faifeau o le Ekalesia ia Rev Sione Eli na molimoli le faafetai ma le faamalo i si o latou Ekalesia mo galuega lelei auā lava le taulaga ola mo le Alii. Na valaaulia sui o Ekalesia e molimauina lenei aso taupoina e aofia ai le susuga i le Toeaina Faatonu ia Rev Peleti Toese Toailoa ma le faletua ia Senetenari o le EFKS Fairfield, o le susuga i le Sea o le Ekalesia Metotisi ma le faletua faapea le peresetene o le auuso. E lē gata i lea o paia lasilasi o Ekalesia ma le mamalu lautele na molimauina lea aso e fou i le silasila ma le mātau.
Na saunoa le Fetalaiga Ofoia o le sui o le Ekalesia e faailoa foi le maofa o le tamā o le galuega ma le faletua i le aao foai o le valaaulia ina ua o latou toe lafo foi ma faamalo i le galuega e ala i seleni lea na maua ai se tinoitupe na faateia ai le Ekalesia e $25,000 Ausetalia. “O lenei seleni o se faaaloalo lava a le valaaulia e talimasenei ai le galuega fitā sa feagai ma si o matou aulotu mai le ono tausaga talu ai (2008),” o se saunoaga lea a le Fetalaiga Ofoia. E lei iai foi se talosaga tusitusia i le valaaulia e faatagisia ai se fesoasoani tau seleni ae peitai o le agaga faafetai ma le faagaeetia foi o le paia ma le mamalu o le aofia na atili maualuga ai lenei aso.
“Sa na o le valaaulia lava o nai uo ma paaga e afifio mai tatou te pepese faatasi ma fai‘aiga e sii ai le viiga i le Silisili Ese auā le faataunuuina o lenei galuega tele, ae peitai ua tali mai le valaaulia i se teu faatupu ma le faatamalii ua atili faagaeetia ai le aulotu.” “Ma e momoli atu ai le faafetai tele mai lo matou Ekalesia i le afio o le susuga i le tamā o le galuega ma le faletua i la outou faakerisiano, faaaloalo ma le tausi ekalesia.”
