E lele a le toloa ae maau i le vai. O le faatalauula mai a le Pulega a Fagaloa i Samoa i alo ma tama fanau, tamalii ma failauga, paolo ma gafa, o nopia‘i i totonu o Brisbane nei, na a‘e ai se tofā e talo ma valaau le toto salalau e usuia se fonotaga.
O le Aso Toonai 14 o Iulai na usuia ai le fono lona lua, ma ua amata vavala mai ataata o Ta‘ulelei e ala i le tali mai o tamafanau e ala i le auai mai ma opogi lea foi faamoemoe.
O le ‘auga o aute o le potopotoga, ona o se tusi talosaga na tuuina mai Samoa i se seleni e fia fauina ai se maota o le Pulega a Fagaloa auā fonotaga i Malua pe a usuia fono tetele a le Ekalesia aoao a le EFKS. Ua iai nei la le faamoemoe o le a toe mafuta le mafutaga i le Aso Toonai 28 o Iulai ma faamaopoopoina ai se tasi saoga.
E moni lava le upu e susue lava le faamalama o le Isaraelu moni ma tepa i lona nuu. Mo le silafia, o le Peresitene o le Mafutaga a Fagaloa i Brisbane nei, o le fetalaiga ia Ofo‘ia Ofisa Lemamea; Failautusi o le fetalaiga ia Fiu Vagafā ma le Teutupe o le fetalaiga ia Muaava Togia.
Mo nisi o tama fanau a Fagaloa o fia maua se fesootaiga, e lelei ona valaau mai i le numera lenei a le failautusi 0421 331 832.
