O se tasi lenei o alii taalo iloga o le atunuu o Samoa, i le taaloga “Fusu Feaa” e sese foi ma lona fiafia i lea taaloga, ma o se tagata taalo e lē foi, e naunau pea ma naunau atili i lea taaloga e ui e afaina ai ona foliga.
Na vaaia le afaina tele o foliga o le alii ia Mark Hunt ananafi i sana taumafaiga i fusuaga i Adelaide na la fetaui ai ma le alii ia Stripe Miocic i se fetauiga UFC Fight Night 65 ananafi i Adalaide.
Na faateia le tapuaiga. 41 tausaga le talavou o lenei alii taalo. Na manumalo ai le alii Amerika i le TKO (13-2) ma o le paga lea sa taualugaina ai le afiafi o Fusuaga o lea afiafi. E faapea le talitonuga o nisi o se fusuaga ua umi ona faaauau, e ui ina faamanu‘alia le alii ia Mark Hunt, ae o loo faamanuiaina uma siaki ma mautinoa ai o loo lelei atoatoa vaega o lona tino.
E lē o faapopoleina manu‘aga o loo feagai ma ia i le taimi nei, na o le fufula i vaega o le tino ae leai ni mea e faapopoleina ai. Na ta‘ua e le pulega a Mark Hunt o le aso lea sa mafuta atu ai le alii fusu i ana uo ma aiga. O loo fesiligia le tulimanu a le alii ia Mark Hunt pe aisea na lē togi ai le solo ina ua vaai atu ua foliga tigaina le alii fusu, ae o le alii ia Mark Hunt e lē solomuli gofie e finau lava poo fea lava e oo i ai.
O loo faaalia foi i lenei taaloga le tulaga o loo faailoa mai ai e le Peresitene i sona finagalo sa tatau ona vave taofi le fusuaga, ina ua agai atu ina afaina tele i le taamilosaga tolu. E faafetai i lenei talavou e ui ina toilalo ae e lē uma ai avanoa i le agai atu i luma, o loo faalototele foi i le tapuaiga a Samoa aoao i lea afiafi.
E moni ai le muagaga a Samoa, O le malolo a le tamalii.
