O le tamaitai o Miracle Ailima 10 tausaga, o le sui tauva mai le aoga Randwick Park School i Manurewa, na sola ma le tulaga muamua o le tauvaga Tautalaga Faa-Samoa a aoga tulagalua o le vasega 5 ma le 6 i le Aso Lulu na sei mavae atu nei.
O se alo faasino i le susuga ia Ailima ma le faletua ia Tepora Ailima mai Saanapu ma Manurewa. O le autu o lana tautalaga faa-Samoa, “E aogā le tupe ia te au.”
Ua tele tausaga o faafoe ma tuufaatasia e le aoga Jean Batten School lenei tauvaga i tausaga taitasi, ma o le tausaga nei e 16 aoga na auai o latou sui tauva.
O se mitamitaga lea i soo se Samoa o loo alala ma nofomau i Aotearoa nei, ona o loo iai ni avanoa faapenei, e molimauina ai taleni a fanau laiti, i le faaaogāina o le tatou gagana Samoa i totonu o Niu Sila i le faatinoina o lenei foi tulaga tāua o le Aganuu Samoa, o faiga lauga ma tautalaga.
E le maua uma e nisi atunuu tetele i le lalolagi ituaiga avanoa faapenei, peitai e tele le faatāuaina o aganuu ma measina a Samoa i totonu o lenei atunuu. O le tauvaga lauga na se’i mavae atu nei, na molimauina ai le ‘oa o le gagana, o le lelei o faasamoa ma le momoliina o se feau taua i se auala faafaigofie, e tauala atu i tautalaga a le fanau aoga laiti.
O vaega na togi i ai le faamasinoina o le tauvaga, e iai le manino o le tautala faasamoa, o le feau momoli o le autu o se tautalaga, o le vaevaeina o manatu i ona tulaga tāua ma le aotelega, ia mataalia foi le failauga ma ia faaaogāina le gagana faigofie, ia mautinoa o malamalama le tamaititi i lana lauga o loo fai, aemaise o le taimi faatulagaina e tai tolu minute.
O nisi nei o vaega na lautogia i ai le tautalaga a le tamaitai o Miracle, ma autasi i ai le faaiuga ona o le lelei tapena ma le mataalia o le tamaitai, faapea le faaaogāina o le Gagana aemaise o aiaiga na togi i ai le faamasinoina o le tauvaga.
O se vaaiga matagofie ma le maofa foi i le maitau, ona e maeu foi sauniuniga a nai fanau uma na tauva. O le faafetai tele foi i mātua na lagolagosua ma fesoasoani malosi i le faufauina o manatu ma le ‘aoina o lauga a le fanau, aua e lē o se galuega faigofie, aemaise o aoga taitasi na iai o latou sui.
E toatolu faamasino na nafa ma le galuega fita, peitai na tasi lava iuga na aufaatasi i ai i le tamaitai na manumalo, faapea i latou uma na lautogia i le tauvaga lauga faa-Samoa o lenei tausaga. O loo iai le faamoemoe mo le tausaga fou, o le a toe faia ai lenei faatasiga, ma faaopoopo ai le toatele o aoga o le a auai o latou sui tauva, i lenei lava tauvaga lauga.
Iuga o le Tauvaga Lauga Faa-Samoa
Miracle Ailima – Randwick Park School; Eline Peni – Mangere East Primary School; Henry Paneta – Otahuhu Primary School
Lisi o tamaiti na auai
Newton Tanielu Mamea – Prospect School; Saia Mose – Favona School; Ionataga Fialelei – Oranga School; Time Ifi – St. Mary MacKillop School; Reagan Tapuai – Finlayson Park School; Lilyann Sila – May Road School; Siala Pula – Fairburn School; Caroline Victor – Christ the King School; Ruta Vaega – Jean Batten School; Leilani Ginnen – Richmond Road School; David Sala – Rosebank School; Aukusitino Etuale – Sutton Park School; Dorothy Niu – Sir Edmund Hilary Collegiate
