Na suipi Fiti i le Tauvaga o le taitoafitu a Gold Coast i ‘ai e 32-14 a Niu Sila i le matautia o ana faatini aemaise le saoasaoa uma o tama.
O Samoa na faia‘ina i le Quarterfinal ia Fiti i ‘ai 19-7 ma see ai loa le Manu i le Plate. Na faiaina ia Farani ma malolo ai loa mai le tauvaga.
O le aso muamua i taaloga o le Pulu na mataina le manumalo a Samoa i le ‘au malosi a Spain sosoo ai ma se taaloga mataina ma Kenya lea na sao i le semifinal o le ipu autū. Na manumalo le Manu ae valalata ai ma Kenya 14-12.
Na see atu Kenya i le valu pito i luga (1/4) ma manumalo i sekone faaiu o le taaloga ia Ausetalia ma fetaui ai loa Kenya ma Niu Sila i le semi. E ui na manumalo Niu Sila ae na vaaia le alualu i luma o taumafaiga a Kenya.
I le taaloga faaiu la a Samoa ma Egelani i lana pulu e saili ai le numera tasi ma le numera lua, na sosoo sikoa e lua a Egelani ma sili ai o latou ‘ai 12-7. Aepeitai na faamalosi le Manu ma maua le sikoa muamua a Afa Aiono ma tulai mai ai Samoa 7-12, sosoo ma isi sikoa e lua mo ‘ai faaiu 19-17.
O lea manumalo a Samoa na tulaga muamua ai loa i lana Pulu ma seei atu ai i le aso faaiu e fetaui ma Fiti i le valu pito i luga. Na vaaia le finau o le amataga auā o taaloga lava a Fiti ma Samoa i tausaga uma e faapea.
Ae peitai o le sasi muamua a le Manu Samoa ina ua tia‘i la latou sweeper na faapea ona kiki ai e Ratu Alipatae le polo ma tuliloa atu ma sikoa ai Fiti i lalo o le pou.
Na iai avanoa e tolu e sikoa ai Samoa i le tulimanu ae na toe tulitatao atu lava e Fiti ma maua. Ua misia ai lava Pesamino ma Paul Perez i taimi faapea.
O le isi sikoa a Fiti na maua fua ina ua faapea le Manu Samoa ua ili le faaili a le laufali i tua o le laina luasefulu lua a Fiti, ae leai na osofai mai ai lava iina Jioji Ragamate ma tamoe mai ai i luga o le laina ma sau ai i lalo o le pou mo ‘ai 14-0. Na amata ona vevesi le Manu i le ‘afa faaiu mo sa latou ‘ai ae na tele ai foi ma polo leiloloa ma pa‘ū.
Na toe sikoa ai Fiti mai ia Ratu Alipate ma sili e 19-0. O le minute mulimuli o le taaloga na osofai ai Samoa e latalata i le pou ma lusi ai le polo ma taufao ai ma Fiti, lea na unai loa e le Manu Samoa ma sao ai le polo i tua ia Lio Lolo ma faapalasi ai loa i luga o le laina mo le sikoa faaiu Samoa 7 Fiti 19.
O le sao mai lava lea a Fiti na lē toe lavea ai ma Suipi ai i le tauvaga. E tolu sikoa a le alii fou ia Alipate Ratini o Fiti lea na fiu Niu Sila e tuli solo i le suega siamupini. O isi sikoa a
Fiti na maua e Jioji Ragamate, Ilai Tinai ma la latou kapeteni ia Levani Botia. O le ‘au a Fiti o se ‘au talavou uma tama e oo foi i le latou faiaoga ia Timoci Wainiqolo, o le taimi muamua lea ua avea ai ma faiaoga o Fiti.
O le manumalo foi a Fiti na atagia ai le toatele o a latou vaalele poo tama saoasaoa na o le maua lava o le avanoa e fiu e toe tuli. O le a sosoo ai ma le tauvaga i Dubai i le aso 30 o Novema – 1 Tesema 2012.
Faaiuga Tauvaga i Gold Coast Ausetalia
Talitā:
Sikotilani 40 – 5 USA
Ipu Faaofuofu:
Sepania 19 – 14 Egelani
Ipu Mafolafola:
Falani 14 – 7 Atenitina
3rd/4th RSA 40 – 7 Kenya
Ipu Autū:
Fiti 32 – 12 Niu Sila
