Suia tulafono, 24 itula e tatala faasoloatoa ai Maketi i Fugalei

O le oono o le loto tiga, ma le lē fiafia ina ua tatala foi le maketi i Fugalei ae toe fofola atu ma tulafono e pulea ai le nofoaga, ua liua uma ina ua vave tali ane le Minisita ma le pulega o le maketi.

Sa mae‘a ona tatala le atina‘e e le Palemia i le amataga o le vaiaso ua mavae, ma laulau ai e le taitai o le Malo fuafuaga na faataoto mo le toe fausia o se isi maketi ma faaletonu na tuta‘ia ai le galuega ma tuai ai ona mae‘a.

Peitai o le fiafia o le au faifaatoaga ma le au faipisinisi laiti ua iai se maketi tele ma lava avanoa latou te faaaogā, na liua i le ita ma le lē fiafia ina ua folafola i ai tulafono fou.
E sā ona toe tofa se isi i le maketi ma e tatala i le ono i le taeao ae tapuni i le ono i le afiafi. E tatau ona toe foi ma ave uma a latou oloa, ona toe usu atu lea ma avatu. “O le galuega tele le ave i le fale ma toe aumai ae leai ni a matou taavale. O tupe alu foi nei mea”. O se tasi lea o lagona faaalia ina ua amata faaaogā le maketi i le Aso Lua ua mavae.

O nei tulafono na mafua ona o faaletonu sa matauina i tausaga ua tuanai i le taimi o iai le isi maketi ua tala ma toe fau ai le maketi ua iai nei. O le mau a nisi o le pulega sa avea le maketi sa iai ma aiga o nisi o le au faifaatoaga ma le au faipisinisi laiti. Ua tutupu ai ma nisi faaletonu ona o le nonofo ai i le nofoaga.

Peitai o le mau a le au faifaatoaga ma le au faipisinisi e manaomia le tatala faasoloatoa ina ia faatau atu ai pea fua o faatoaga ma isi oloa o loo manaomia e le atunuu.

O le lē fiafia o le toatele na toe foi ai e faaaogā le maketi a Toleafoa Faafisi ma le maketi a Ah Liki. Ina ua toe fono le pulega o le maketi ma le Minisita le afioga Lautafi Fio Selafi Purcell, i le Aso Tofi na maua ai le faaiuga e talepe tulafono na faatulaga.

Na asia le nofoaga i le afiafi o le Aso Faraile na tea nei ma e taunuu atu le sui o le tatou nusipepa, ae fetaui tonu ma le faasilasilaga a se tasi o ofisa sinia o le pulega. Na faailoa ai o le a tatala mo le 24 itula ma o le a talia foi le tofafā ai o le au faifaatoaga ma le aufaipisinisi laiti.

Na pau lava le aiaiga e faatāua, afai ua mae‘a ona faatau oloa a nisi, e tatau ona agai loa i o latou aiga, ae lē o le tofafā ai i le maketi. A fia agai i le fale i latou o iai pea oloa, e mafai ona ufi a latou oloa ae vaai e le aufaigaluega pe tuu i isi tagata o tofafā ma nonofo ai le vaaiga.
O nisi o vaaiga fou ua iai nei ua leai ni paipa sa faamalu ma taeele ai tagata e faatau lava a latou oloa e pei ona sa iai i le maketi tuai. O le fesili poo fea a faatino ai lea tulaga mo i latou e tofafā ai i le maketi. O falelēta‘ua o ni nofoaga lelei tele ua saunia peitai e iai le talitonuga e lē umi ae faaletonu ma lē lelei foi ona o le lē galulue faatasi o tagata uma.

Se vaaiga i le maketi fou i Fugalei ma le au faifaatoaga ua lolofi atu e faaaogā