E iai se vaega o le soifuaga o le afioga Tupuola Terry Tavita, e leai se isi na te silafia seia vaganā lona tina, ma o se vaega lelei i totonu o lo latou aiga.
O le vaega lea o le folasaga a lana loia na apo ma talia e le faamasinoga e fua i molimau tusitusia poo testimonials sa tuuina atu e lona tina, o le toalua o lona tuafafine ma nisi o ona uso ma tuafāfine ma lona aiga.
O le faasaga a le faamasinoga i moliaga e lima na faamaonia o le faatonu o le nusipepa a le Malo lea ua faailoa e lana loia ua faamavae mai lana galuega, ua faatonuina ai Tupuola e totogi le $550 o le aofaiga atoa lea o le totogi o le faamasinoga ma le itu a leoleo. Peitai ua faamaonia ona moliaga ae ua faapafala se faasalaga (convict and discharge).
O le moliaga o le lafo o upu taufaifai ua faamaonia ae ua nofo vaavaaia ai mo le ono masina.
I le folasaga a le afioga i le faamasino Vaepule Vaemoa Vaai, a o lei faia lana faaiuga sa ia talanoa ai i itu lelei o lē ua molia e pei ona tuuina atu ni molimau a lona aiga, o lana faifeau ma le afioga i le Palemia susuga Tuilaepa Lupesoliai Sailele Malielegaoi.
O nei molimau tusitusia uma sa agai ai i le tuuina atu i le faamasinoga o mau lelei faasino i le afioga Tupuola, ma aumai se finagalo o le faamasino e faapea o le gaioiga na faia e lē ua molia ma faasalaina, o se faaiuga ua sasi ai le faaiuga.
O le molimau a le palemia na faaalia e le faamasino ua ia faaaogāina le folasaga a le taitai o le Malo e faasino i le olaga galue o Tupuola ae o le folasaga i le mataupu i le Ifoga ua lē faaaogāina, i le finagalo o Vaepule e mau eseese ai tagata.
E lei faailoaina e lana afioga poo vaega sa tuuina atu e le Palemia e faasino i le Ifoga, ae o le iloiloina o se faaiuga i moliaga na taunuu ai le faamasinoga i le faamaonia uma o le lima moliaga, ona o le faia e Tupuola ma lona aiga o le Ifoga i le aiga o le tamaitai o loo aoga faatusitala na aafia, o le faamaoniga lea o le ioeina e lē ua molia o le mea na tupu. O le taunuuga lea ina ua lē faamaonia le tali tetee a le alii faatonu i moliaga uma a leoleo.
O le faasalaga a le faamasinoga sa faatonuina ai Tupuola e totogi uma le limaselafu limasefulu tala a o lei taina le 4 o le afiafi o le Aso Faraile 26 o Iuni 2015 na fofogaina ai le faaiuga.
O lona lē usitaia o le faaiuga e tuuina atu ai i le falepuipui mo le fā vaiaso. O le taimi nei e lē o toe galue Tupuola Terry Tavita i le nusipepa a le Malo, ona ua faamavae. Sa faailoa e lana loia na faamavae o ia ina ua tulai mai le mataupu ma oo i leoleo.
