E sui Faiga ae tumau pea Faavae – Lotu a Tamaiti i Perisipeni

O le lou ma lona fuata, e sui a le tausaga sui foi ma ona suiga, e tumau lava faavae se‘i vaganā ai le laalaa i luma o le tele o faamanuiaga a le Atua i le tamaoaiga o loo talisapaia e aiga, e lē gata o le tino ae sili i la le agaga.

Pe a faatusa i aso ua tuanai i le mativa ma le lē tagolima a o nei aso ua lē masino le tele o le tamaoaiga e ala i taumafa ma isi tulaga o loo tausi ai aiga. E uigaese tapenaga a ekalesia taitasi faapea aiga i le Aso faapitoa o le fanau e pei ona faamanatuina ia Oketopa.

Na asia le Ekalesia EFKS Westside i Inala lea o loo galulue ai le susuga i le faafeagaiga ia Rev Lance faapea le faletua ia Lite Tautiepa. O le faafeagaiga foi o loo avea ma failautusi o le Pulega a Sisifo i le Matagaluega EFKS a Kuiniselani.

E lē gata i lea o le Ekalesia AOG itu palagi i le pitonuu o Inala o loo faafoeina pea a latou sauniga i le gagana Samoa. O le ekalesia lea sa galulue ai le susuga i le Toeaina ia Ps Vanu Toma (ua fai i lagi le folauga) ae o loo soifua pea le faletua ia Va Toma.