Vaega 2 – Faaliliuina mai Suesuega a Mike Kelekolio
I tala ole vaiaso na tea nei, ile suesuega faapitoa ile faamalolo ai ole faiaoga ale Samoa Sevens na amata iloa ai le faaletonu na oo iai le ‘au i lalo ole vaaiga a Damian McGrath. E ui na manumalo le ‘au i isi ana taaloga, faatasi ai ma le manumalo ile Paris Sevens i Farani, ae peitai, e lei ausia ele Manu Samoa Sevens le Olimipeka i Rio.
Ole tasi lea matatia pito sili ona tāua na faatonuina ele pulega ale Manu Samoa ina ia ausia e Damian McGrath. E ui lava i lea, sa iai pea le talitonuga ale Laulau faapitoa, lea na suesueina le mataupu, e faapea:
•E tatau ona faaauau pea le tofiga o Damian McGrath e fai ma faiaoga ole Samoa Sevens
•E ao ona toe filifilia se faiaoga lagolago fou (Asst coach) ma se taitai malaga fou
E mafua mai ia faaiuga ona ole talitonuga ale Laulau i itu nei:
•Na ausia e Damian McGrath matatia na faataoto mo ia ele SRU
•E iai ma le manumalo o Samoa ile Taitoafitu i Pale, Farani
•Na ausia ele Manu Samoa Sevens le tulaga 9 ile 2016, mai le tulaga 10 ile 2015
•Oloo iai pea le malosiaga ole Manu Samoa Sevens e maua ai sona avanoa ile Taitoafitu ile Olimipeka.
Oi latou na filifilia mo lea suesuega faapitoa e iai Matafeo George Latu (Sui Taitai Fono ole SRU), Mr Brian Hopley (Faatonu ole Lakapi ale SRU), Soifua John Schuster (Faiaoga Tuai ale Samoa Sevens) ma Ms Virginia Tuatagaloa (SRU Human Resource Adviser). Oi latou uma nei na iai le sailiiliga faapitoa ale SRU.
Ole amata ona galue ai o Damian McGrath mo le SRU na iai tuutuuga na faataatia e tatau ona ausia ele Samoa Sevens:
•Ia ausia e Samoa le tulaga 8th ile lalolagi ile faaiuga ole 2016
•Ia maua se avanoa o Samoa ile Olimipeka i Rio
E lei ausia ele Samoa Sevens ia matatia na faataoto mo Damian McGrath, ona faamuta ai loa lea o lana konekarate ele SRU. Ae o suesuega ale laulau na iai faaiuga ma fautuaga nei mo le SRU:
Na iloa foi mai le ripoti ole vaiaso na tea nei, na matuā faaletonu fesootaiga a Damian McGrath ma Muliagatele Brian Lima, le faiaoga lagolago, faapea foi ma le taitai malaga, Masunu Talapusi.
Na oo lava ina fai toatasi e McGrath lana galuega. E lei faaaogāina Brian Lima. O taimi sa faaaogā ai Lima, ole faatamoe lea o ia i toleniga ale ‘au, e faaatoa ai faataitaiga ale ‘au, pe fealuai foi e la‘u meataalo, ma mea e faaaogā i toleniga.
Ile filifilia ole ‘au e taaalo, e fai toatasi lava e McGrath. E lei iai ni “Selectors” ale Samoa Sevens, na‘o McGrath lava na filifilia ‘au taitasi. E lē ose mea lelei lea i totonu ose ‘au oloo tau atiae.
Ae o lana ripoti foi ile faaiuga ole taamilosaga, na ia fautuaina ai le faatea ese o Lima ma Talapusi. O lea la ripoti a McGrath e o tutusa lea ma le faaiuga ale Laulau e pei ona tusia i luga. Ile finagalo faaalia ose tasi o Sui ole SRU, sa sili ona taatia le suesuega ma le ripoti na tusia faasaga ia McGrath, na o tupe maimau na alu ilea suesuega.
E iai le faaletonu ole suesuega. O soo se suesuega lava, e tatau pea ona faatalanoaina itu e lua. Le itu a Damian McGrath, aemaise foi le itu a Brian Lima ma Talapusi. Ua fesiligia lea tulaga, ona ole tutusa ole faaiuga ale Laulau na faia le suesuega ma le ripoti a McGrath.
Ua faaaogāina foi e Damian McGrath le faaiuga ale Laulau e pei ona iai i luga, e auala atu ai lana tagi faasaga ile SRU ile Faamasinoga, e faapea e lē amiotonu le faamaloloina o ia.
Sa tatau foi ona suesue pe na sa‘o ma lelei le va o McGrath ma lana pulega, Lima ma Talapusi. Mai le Ripoti oloo ta‘ua ai, na faatalanoaina ele CEO ale SRU, Lima ma tama taaalo e toatolu.
Peitai ua faamaonia, na faatalanoaina tama taaalo ia ile aso lava lea na faailoa ai le Ripoti. E fesiligia ai la, pe faapefea ona faavae le lipoti ile faatalanoaina o nei sui e toatolu ole ‘au, e lē gata i lea e fai nei faatalanoaga, ae ua taatia le Ripoti ua uma ona tusia.
E oo foi ile faatalanoaina o Lima, e foliga mai ile taimi na fesiligia ai o ia mo le Ripoti, ua leva ona uma sailiiliga ma fai le faaiuga ale Laulau.
Ile Ripoti na ta‘ua ai, le feeseeseaiai a‘o loma le taamilosaga i Monaco. Ole avanoa mulimuli lea o Samoa mo le Olimipeka. Na ta‘ua ai ile Ripoti le lē fiafia o McGrath ile filifilia ole ‘au e aunoa ma le fesiligia o ia.
Ua te‘i lava ua sui le filifiliga ole ‘au auā ole tala a Lima, e na‘o McGrath lava na filifilia ‘au uma mo taamilosaga taitasi sa tausinio ai le Manu Samoa Sevens. Pei e foliga mai na faaseseina e McGrath le Laulau na faia le suesuega, i lona unaia lea ole faaletonu ole ‘au ile taamilosaga i Monaco ile filifiliga ole ‘au, auā e lei filifilia e McGrath le ‘au lea.
Ile Fono na sosoo ai ale SRU Board e na‘o le Taitaifono, le Afioga ile Palemia Tuilaepa Sailele Malielegaoi ma Matafeo le taitaifono ale Laulau Suesue, na lagolagoina le faaiuga ole Ripoti, e faaauau pea le galuega a Damian McGrath. Ae ole isi vaega uma ile SRU Board, na tetee i lea faaiuga.
Ile masina o Iuni, a‘o lei uma le World Series, na fai ai le fono faavavevave a Latu, Faleomavaega CEO SRU, Faatonu o Lakapi SRU, Brian Hopley ma McGrath. Na faailoa ai e McGrath se tusi faasoesa (e lei sainia le tusi), tusia e Luke Stephenson lea na galue mo le Samoa Sevens a‘o lei avea McGrath ma faiaoga, na ta‘ua ai e Stephenson e faapea e leai se tomai o Lima ma Talapusi e fai ai le galuega mo le Samoa Sevens.
Peitai, ile fesiligia ai o Stephenson ile tusi lea, na ia faailoa ai lona lē fiafia tele. Fai mai e lei tusia e ia lea tusi ma e mafanafana foi le latou mafutaga ma “Mace” ma “Brian”. Ae ole faamatalaga a Lima, e na‘o McGrath na filifilia ‘au uma, e aunoa ai ma se fesoasoani atu o ia iai poo le fesiligia foi o ia.
Na lagolago Talapusi ile mau a Lima. Fai mai a ia, e lei aveina e McGrath se avanoa se tasi ia Muliaga e fesoasoani ai ile filifilia ole ‘au. Na faailoa foi e Talapusi, le faasāina o Muliaga mai le ‘au ile taamilosaga i Sini, ona e lei lagolagoina e tama ole ‘au Lima, ose mau na teena e tama ole ‘au ina ua faatalanoaina. E foliga mai, na faasā Lima mai le ‘au ona ole lē fiafia iai o McGrath ae lē o tama ole ‘au.
Na ta‘ua foi e Talapusi, na matuā lē fiafia tele tama matutua ole ‘au ma faaalia lo latou faanoanoa ile faasāina o Lima mai le ‘au e McGrath. Na oo lava ina faasāina e McGrath Lima mai le talanoa ma tama ole ‘au a‘o iai i Farani. Ae na iai le manatu ole ‘au e tatau ma onomea le aiā o Lima ile ‘au i taimi uma. Ae na faasā e McGrath.
Ile ripotia ole faasāina o Lima mai le ‘au i Farani, na faailoa ise imeli na tuuina mai ia Brian Hopley (Faatonu ole Lakapi a Samoa), na ta‘ua ai e McGrath i lea imeli le lagolagoina o ia ele ‘au atoa i lana faaiuga sa faia ia Brian Lima.
Ole amataga lea ole faaiuga, ile talitonuga a Talapusi. Ina ua fesiligia McGrath e Hopley, na ia ta‘ua ai “lona lē fiafia tele i tulaga faaleaganuu oloo aafia ai le ‘au. Ma ia fesiligia ai Hopley e filifili poo Lima poo Ia.
I lea la suesuega, ma le faaiuga ole Ripoti na lagolago ai le Laulau ile itu ale faiaoga. Ma tusia ai ile latou ripoti le tatau pea ona faaauau le galuega a McGrath mo le Samoa Sevens. Peitai na teena ele Laulau ale SRU le lipoti ma faia ai le faaiuga e faamalolo McGrath…E faaauau pea.
