O se tasi o kamupani ua see mai i Samoa nei mai i Niu Sila ma ua faamautu i Apia, ua maua le suesueina e le Faletupe Tutotonu i le taimi lenei ona o masalosaloga i tupe faamomoli o loo sau ai ma le faamatalaga o tupe faamomoli mo faalavelave atoa ai totogi o tagata faigaluega a lea kamupani i Samoa nei.
A laitiiti lava le tupe e sau ai i lenei ofisa e $30,000 i le vaiaso ma o le sosoo lava ona sau o lea ituaiga seleni ma sili atu foi, na taofi ai loa e le Faletupe Tutotonu ma ua faia nei i ai sailiiliga.
E matuā lē mafai lava ona faalauiloa mai e le Faletupe Tutotonu suesuega o loo faia ona o le manumanuga i faaleaga ai suesuega ua faagasolo, ae ua faamaonia mai o le tasi lenei o numera o kamupani ma ofisa ma tagata taitoatasi foi ua sau faamomoli i fafo ma ua masalomia e lē o ni tupe o maua mai i ni auala e tusa ai ma le tulafono.
O le numera o kamupani ua masalomia le faia o nei faiga i Samoa ua faatuputupulaia ma ua mautu lava foi le vaega e nafa ma suesuega o nei mataupu i totonu lava o le Faletupe Tutotonu a Samoa.
O suesuega a talafou na matauina ai le kamupani e pei ona ta‘ua i luga, e aumai tupe nei e lē teuina i ni tusitupe poo ni teugatupe a le kamupani lenei, ae e vave lava ona faasafua ese ma faaaogā. E faatau ai taavale, e tufa i nisi o le kamupani ma agai i le fausia o fale ma le faatau ai o fanua.
O nisi nei o gaioiga na molimauina ae ua faapea ona agai uma i ai sailiiliga a le Faletupe Tutotonu. E lē mau se tupe ona o le manatu e masalomia ai auā o lea e sau i fafo seleni nei.
O lea la ua taofia le toe sau i totonu o seleni nei mai i fafo ona o masalosaloga nei ma e tetele faasalaga pe a faamaonia.
