O loo suesueina nei ni gaoiga ua lipoti atu i le Ofisa o Leoleo ua aafia ai ni teugatupe a ni tina se toalua.
O le suesuega muamua lea ua faapea mai le sui sooupu o le Matagaluega o Leoleo, Su‘a Muliaga Tiumalu, ua tapunia ina ua mae‘a suesuega ma maua ai e lei toesea le tupe a le tina na faapea lana faamatalaga ua alu atu e tala mai lana tupe ua leai se teugatupe.
O lea tina o se tamaitai faipisinisi – ma na ia logo leoleo e agai atu ua leiloa se tinoitupe e $100,000 Tala Samoa ua toesea mai i lana teugatupe. Peitai na faaalia e le ofisa o leoleo ua mae‘a lelei lava suesuega e lē faamaonia ia tuua‘iga.
O loo iai se isi suesuega ua faatautaia nei e le ofisa o Leoleo e faatatau lava i lea mataupu peitai e lē o mafai ona faalauiloa mai. E foliga mai o se taufaavalea ae ua alu ai le taimi o le Ofisa i le sailiga o tagata na masalomia i le aveesea o le tupe a lea tina.
O le isi tamaitai o le Westpac e iai lana teugatupe lea foi ua lipoti ane i le faletupe ua toesea lana teugatupe lea e sili laitiiti atu ma le $5,000 tala sa iai.
O lea la ua amata foi le galuega a le Ofisa o Leoleo e faatatau i lenei tagi e ala lea i le faatalatalanoa o i latou na fesootai ma le teugatupe lenei a o loo galulue ai i le faletupe lea o le Westpac.
I le tupe lea na ta‘ua le leiloa mai i le ANZ, na fesiligia ai le ofisa o leoleo pe lē o faia la ni tagi a i latou na tuua‘ia i le aveesea o lenei tupe faasaga i le tamaitai faipisinisi na tagi peitai e lei tuu mai se faamatalaga se‘i vaganā le itu lea e iai le isi suesuega lea ua faatautaia faasaga i le mataupu lenei.
Sa telefoni mai le Westpac e fia iloa le mafuaaga o le faailoa o le latou foi mataupu ona e lē o manino i ai le toatele o le aufaigaluega ae o le faamatalaga na tuu atu i ai, o le suesuega lea ua faamaonia mai e leoleo ma o le fesootaiga foi o leoleo lava pe a fia maua se tali.
O le tala a Leoleo ua oo atu le tagi ua talosagaina ai e le pulega o le Westpac i Apia se fesoasoani a leoleo.
