Ua lua nei vaiaso talu ona lipotia le faavaeloto ai o le fu‘a poo le tagavai o le Malo Tutoatasi o Samoa, e lē gata o lumafale o le pisinisi a le Sui Fofoga Fetalai i Vaitele-uta ae o le Maota Samoa i Vaitele-tai.
Sa tapue e se tasi o nusipepa ata o le fu‘a a o faavaeloto, ma fesiligia ai le mafuaaga. Peitai ua saga tulituliloa pea e le tusitala lenei mataupu ma fesiligia ai le sui komesina o leoleo o ia foi o le sooupu le afioga Leaupepe Fatu Pula. “O se solitulafono i lalo o le Tulafono o le Fu‘a ma le Vii o le Fu‘a o Samoa se tasi na te lē faaaloalo i ai, pe faia se isi lava tulaga i le fu‘a o le Malo Tutoatasi o Samoa”, o le finagalo lea o Leaupepe Fatu ina ua tāpā sona finagalo.
O loo aiaia se faasalaga e 6 masina i le falepuipui poo se sala tupe poo faasalaga uma ia e lua mo se tagata e faamaonia se solitulafono i lalo o le Tulafono o le Fu‘a ma le Vii o le Fu‘a.
O le tausaga e 1994 na pasia ai lea tulafono e le Palemene ma faamamalu i ai tagata uma. E iai molimau ua latou faailoa i leoleo na latou vaaia le faavaeloto o le fu‘a i luma ane o le pisinisi a le Sui Fofoga Fetalai i Vaitele-uta faafesagai ma le malae taalo faavaomalo i Tuanaimato. Ua ta‘ua foi e nisi molimau lo latou vaaia o lea lava tulaga i le fu‘a sa faavaeloto i luma ane o le Maota Samoa i Vaitele-tai.
E vaaia lea tulaga o loo toesea ma le atunuu le Sui Fofoga Fetalai mo le auai i toe sauniga o se tasi o ona uso sa faia i Niu Sila.
O le lomiga a le nusipepa o le Samoa Observer, o le aso 24 o Me 2010 sa faasalalau ai ata o le fu‘a o loo faavaeloto.
O le taimi mulimuli na faavaeloto ai le Tagavai o le saolotoga o le Malo Tutoatasi o Samoa o le vaitaimi o le tausaga e 2007 na tuumalo ai lē sa avea ma Ao o le Malo, Susuga Malietoa Tanumafili II.
O loo iai foi aiaiga faaletulafono o le faatinoina o lea tulaga o le faavaeloto o le fu‘a o Samoa pe a tuumalo ni taitai maualuluga o le Malo ae lē mafai ona soona faatinoina lea tulaga.
Faaalia e Leaupepe Fatu Pula e lei oo atu se faaaliga ia te ia e tusa ai ma lea tulaga, ae o le a tagatagai i ai le Matagaluega mo le faia o se suesuega ma fesiligia le Sui Fofoga Fetalai pe o le ā tonu le mafuaaga na faavaeloto ai le fu‘a i luma ane o nisi o ana pisinisi e pei ona molimauina e nisi ma lipotia foi e se nusipepa.
