Ua amata nei ona suesue e le Matagaluega o Leoleo a Samoa le mataupu e pei ona tula’i mai i le Pulega o Taavale Afi a le atunuu – Land Transport Authority. O le mataupu lenei na mafua ona faagasolo i ai suesuega a leoleo ina ua lomia ai e le Ssamoa Times ni faamaumauga na liki mai i tua lea o loo tuua’ia ai ni sui e toalua o le Pulega.
Faamaonia mai e le sui sooupu o le Matagaluega o Leoleo le susuga ia Auapa’au Logoitino Filipo, e lē o mafai ona tuuina mai nisi faamatalaga e faatatau i lenei mataupu ona o lea ua faatoa amata ai suesuega a le Matagaluega o Leoleo. Saunoa Filipo, e fai lava si ma’ale’ale o lenei mataupu ma e faatoa mafai ona tuuina mai nisi faamatalaga pe a mae’a ai suesuega a leoleo.
E tusa ai ma se lipoti na lomia ai e le tatou nusipepa i le masina o Aperila na maua ai nisi o taavale la’upasese (taxis) ua suia ai tausaga e resitala ai e pei o le taxi la’upasese o le tausaga e 2000 ae na suia lona tausaga i le 2005 ina ia mafai ai pea ona faaauaua ona faala’upasese. O le isi taavale o le ituaiga o le Toyota Allion tausaga e 2003 ae na suia foi lona tausaga i le 2006 peitai e tutusa VIN Numbers o nei taavale.
O lenei mataupu na tu’uaia ai ni sui ofisa sili e toalua o le Land Transport Authority le susuga ia Mataafa Sepelini Poufa ma le tamaitai Loia o le L.T.A o Anoanoai Pepe Lafai. O le alia’e mai ai o lenei mataupu na fautuaina ai e le Minisita o Galuega le susuga ia Papalii Niko Lee Hang le tatau ona faamavae ai o i laua nei.
A’o faagasolo ai nei suesuega na famaonia mai ai e le Minisita le tuuina atu lea o le tusi faamavae a Mataafa Sepelini peitai e lē o fia faamavae le tamaitai Loia ia Pepe. E lē o mafai ona toe tuuina mai se manatu o le tamaitai Ofisa Sili o le Pulega, Galumalemana Taatialeoitiiti Tutuvanu-Schwalger, ona na ia ta’ua ua i lima nei o leoleo lenei mataupu.
O loo tuua’ia ai nei e le Minisita ia Papalii Niko Lee Hang le pulega o le L.T.A i lea faaletonu. Saunoa Papalii, e leai lava se tagata e alu atu sui fua faamaumauga a taavale i totonu o le L.T.A seia vagana ai lava sui o le Pulega o taavaleafi a le atunuu.
O taavale nei ua suia faamaumauga o loo umia ai e nei sui e toalua o le Pulega e tusa ai ma faamaumauga a le Pulega. Fai mai a Papalii, sa lē tatau lava ona tupu lea faaletonu ona o Matagaluega uma a le Malo, e iai lava o latou taiala e limataitaina ai le faatinoina o a latou galuega faatasi ai ma le malu puipuia o vaega uma ina ia soloia ese ai ni faiga faapiopio e faaono tutupu mai ai.
E pei ona silafia o se tasi o suiga fou ua vaaia nei i le ofisa lenei o le Land Transport Authoiry i Vaitele, ua soo atoa vaega o le fale i le tele o Security Cameras, peitai e foliga mai o suiga ua alia’e mai o totonu lava o le lotoifale o le Matagaluega.
Ina ua liki muamua mai ai nei faamaumauga i le tatou nusipepa talu ai, na vave ona agai le pulega o le L.T.A ma suesue muamua poo ai le tagata faigaluega o le pulega na liki ai i fafo nei faamaumauga, peitai o le lē faamavae ai o le tamaitai Loia ia Pepe ona o loo ia teena ai nei tuua’iga e na te lei faia, e ui o ia e pulea se tasi o taavale ua suia lona tausaga, ua manatu ai loa le Ministia ina ia faatino loa suesuega e pei ona tuuina atu ai i le ofisa o le Loia Sili ma le Matagaluega o Leoleo.
E lē o mautinoa mai i le taimi lenei poo le ā le umi o le a faagasolo ai nei suesuega, ae talitonu o le a tulituli pea e le tatou nusipepa le suesuega lenei i le pulega o le Land Transport Authority i Samoa.
