Suesue e le Matagaluega o Aoga tagata faigaluega o loo gaoia oka o meaaoga a le fanau

O loo faagasolo e oo mai i le taimi lenei suesuega a le Matagaluega o Aoga i Samoa e saili poo ai ua fai ma a latou amio le ave faananā o api aoga, o pusa penitala, pusa titina, pusa vase, ma le anoano o isi oloa sa tufa i aoga mo meaaoga a le fanau.
O se faatonuga na faia e le afioga i le Minisita o Aoga na mafua ai lenei suesuega ma o sui o le Ofisa o Suetusi a le Malo ia ua saofafai nei i le Ofisa o Aoga i Malifa e faatautaia lea suesuega tele. O le faamatalaga o ai lava e maua na faia lenei faalēalofa o le a faatea ese mai i le Matagaluega.
Na mafua lea suesuega ina ua faatea ni alii leoleopō se toalua ma agai loa nei alii i le Ofisa o le Minisita ma logo i ai lo la faagaulēmalilie ona o le faaiuga ua faia faasaga ia i laua.
Na ta‘ua e ripoti, o alii lava nei na agai atu i le Minisita ma ta‘u i ai nisi o gaioiga ua aveese ai oka o meaaoga a aoga i totonu o le atunuu e nisi o tagata o le Ofisa faapea nisi o loo fesootai ma le vaega lea o le Matagaluega e faamatuu atu ai oka nei a aoga laiti uma i le atunuu.
Ua silia i le lima tausaga talu ona maua fua api aoga ma isi meaaoga mo le fanau mai i le vasega 1 seia oo i le vasega 8. O se vaega lea o le taumafaiga a le Malo ina ia totogi lava e le Malo meaaoga nei a le fanau. O lea foi la ua fesoasoani Ausetalia ma Niu Sila i le totogi o pili a fanau aoga ma e silia i le 30 aoga ua faapea foi ona suesueina e le Matagaluega ina ua maua e iai teugatupe nei, na faaagaga mo pili aoga a le fanau, ae ua faaaogā e komiti a aoga ma puleaoga i isi atinae i totonu o aoga ae ua lē ogatasi ma le mafuaaga o nei pili aoga.
O loo faaauau foi ona ao e nisi o Komiti o Aoga resitara e ui o lea ua lapataia e le Matagaluega o Aoga e tatau ona vaavaai i le faamāmā avega e ave i mātua auā o lea ua totogi e le Matagaluega o Aoga pili, ua totogi foi ma meaaoga.
O le vaavaai a le Matagaluega e pei ona ta‘ua i le fono sa faatautaia i le va o le Matagaluega, o Komiti a Aoga aemaise puleaoga, a lava le $10 o le resitara ua manaia tele.
O le vaiaso lenei ua toe a‘e ai le kuata lona lua o aoga laiti a le fanau ma o le a tulimatai foi la pe faamata o le a faamalosia le faamāmā avega pe o le a faaauau pea le ta‘i $20-$40 o resitara o loo faaauau e komiti a nuu i totonu o aoga eseese nei.
O le lapataiga na ave e le Matagaluega i le fono e pei ona ta‘ua, o le a saili uma foi aoga ia o loo maua le faaaogā sese o teugatupe ua faaagaga mo pili o le fanau.
O aiaiga o nei pili e ta‘i $100 e ave i le tamaititi aoga e toatasi i le kuata, o le tupe lea ua totogi atoa ai meaaoga a le fanau, e lē gata i lea o le tupe lea ua alu i masini i totonu o ofisa o aoga, totogi ai le pili o le eletise atoa ai le suavai mo aoga uma, ma o pule aoga o loo tele ina vaaia teugatupe nei, ae o loo iai lava aoga o loo ave le faatagaga ia latou komiti e saini ai foi i ia teugatupe.
E ese mai la i le suesuega lea, o le sailiga o i latou ua ave faagaoi oka o meaaoga a le fanau, o lea e tālia se lipoti a le Matagaluega poo ai uma ua aafia ae faatino loa le faatonuga a le Minisita, o ai lava e aafia o le a faamalolo mai ia latou galuega.
O alii leoleopo ua faatali foi pe toe faafaigaluega pe leai.