O le fua e te lulu e te toe selesele i ai. A‘oa‘o le tama e tusa ma ona ala a oo ina matua e lē toe tea ese ai.
O le taeao o le Aso Toonai na faataunuu ai le suega masani o lenei tausaga a le Ekalesia Samoan Assembly of God i Ausetalia (AOG) e lē gata o isi setete ae faapea foi le Pulega a Kuiniselani. Sa faatautaia le suega a le Pulega e le failautusi aoao a Ausetalia le susuga ia Ps Manuula Nai o i laua ma le faletua ia Foloi Nai o loo tausia le ekalesia AOG a Kingston, o se tasi foi o faafeagaiga o loo feagai ma le polokalame mo Maota Gasegase i luga o le leitio a le Penina of Asuisui-Switch1197am.
O le suega a le Pulega AOG a Kuiniselani sa lagolagosua faafeagaiga ma o latou faletua. E 11 aulotu sa auai mai o latou sui e pei ona tauaofai ai ile malumalu o le ekalesia AOG a Inala lea o loo tausia e le susuga Ps Amataga ma le faletua ia Faye Tamamasui.
Na iu manuia le faamoemoe ma e toatele i latou na faaiu i fale‘aiga, iai foi nisi ekalesia sa faia faatali e ala i taumafataga e taualuga ai le aso faapitoa o suega a le Aoga Aso Sa ua iu manuia o lenei tausaga.
E 4 vasega e aofia ai le Under 13, ese le vaega a i latou o loo High School ma Kolisi, ese i latou ua uma ma iu aoga ma le vasega a le aumatutua. E 82 i latou na sueina le suega mai vasega nei i totonu o ekalesia e 11 a Kuiniselani.
Ua faamoemoe o le Aso Sa, 26 o Iuni o le a lauina ai togi i le laugatogi e le gata o tulaga a setete ae faapea foi Ausetalia.
E tele tausaga e maua lava tulaga lelei o le Pulega a Kuiniselani ile tuufaatasiga a Ausetalia, ma e momoli foi le agaga faafetai i faiaoga Aso Sa ona o le latou matafaioi ma le faiva masani o le a‘oa‘o o alo ma fanau a le Ekalesia. A mae‘a se galuega, e foi pea le viiga i le Atua.
