E suamalie le lē faavaivai

Sui o le Komiti Faafoe ma le ofisa o faiaoga
Sui o le Komiti Faafoe ma le ofisa o faiaoga

Sara Petesa A‘oga Amata

E lei to se timu pe auaoa le lagi, a o pepese ma alalaga fiafia le fanau a le Atua, i sui o le Komiti Faafoe i faafeagaiga ma o latou faletua, aiga uo ma ē masani aemaise o le Ekalesia AOG i Otara, e siitia le taulaga faafetai ma le faamanu i le Atua ona ua tau lau o le faamoemoe e pei ona gapatia ai i le fausiaina o le isi faleaoga fou mo le fanau.

O le susuga ia Unasa Laufiso o le fofoga o le Ekalesia sa taitaiina le viiga, ae o le susuga i le faafeagaiga mai Hamilton o le teutupe aoao o le Ekalesia i Niu Sila ia Taula Yung na saunia le tatalo faaiu.

O le CEO a le aoga o ia foi o le faafeagaiga o le Ekalesia i Otara le susuga ia Pastor Seleni Taoai ma lona faletua ia Julie Taoai na ootiina le lipine, ae o le Taitai aoao o le Ekalesia ia Pastor Motu Matia na saunia le tatalo o le faapaiaga o le faleaoga fou ma faaulufale loa ma le maimoaga i le paia o le auvalaaulia.

Sa maitauina le fiafia o fanauiti sa auai i totonu o le fale faatasi ai ma mātua o loo aooga o latou alo i lenei aoga. Na sosoo ma le taumafataga na tapenaina e le ekalesia i Otara ma faaiu ai loa i tu ma le aganuu faasamoa e pei ona masani ai aso faapenei.

O le susuga ia Lupematasila Mamoe sa fai ma sui o le ekalesia e faaleoina le faafetai ma molimolia ni meaalofa mo le Komiti Faafoe sa auai faapea le mamalu o le auvalaaulia.

Talaaga Puupuu

1977: Na faavaeina ai le Ekalesia AOG Otara e le susuga i le faafeagaiga ia Seleni Taoai ma le faletua ia Sara Taoai.

1988: Na maua ai le grandson a le susuga i le faafeagaiga ma ia manatu ai o le a amata se aoga e aoaoina ai le gagana Samoa auā le faatāuaina o anatausili poo taiala i le olaga faakerisiano. O le aso 29 o Iuni na amata ai loa le Petesa Aoga Amata. E tolu ni mea totino a le Ekalesia sa tau amata ai e tina le aoga, o le falesa, faletaavale ma le fale samasama sa iai. E lei faigofie ona sa alualu le Play Group ua leai ni tamaiti, leai ni faiaoga leai foi ni resources. Ae sa iai foi nisi sa fai i le tamā faaleagaga e tapuni le aoga auā ua leai nisi ae na taumafai lava le susuga i le faafeagaiga e alu i lana van tuai lanu moana e piki mai ai tamaiti ma sue mai ai ma se faiaoga.

Sa iai le taimi na fesoasoani mai ai le malo i le grant e faatau ai meataalo a tamaiti ae o le sini autu o lea polokalame ia maua ai mai ni tamaiti ma faiaoga. Ae faafetai i le loto o mātua faaleagaga na taumafai lava.

1998: Na manatu mātua faaleagaga ma le Ekalesia Otara SAOG e apalai i le ofisa o aoga mo se faleaoga. Ma o le faletua ia Pepe Alefaio na telē lana fesoasoani i lena vaitaimi ma ua manuia ai le apalai. O le tau o le faleaoga muamua $179,000 na fau ai e Keith Hay Homes. E 10% na tuu mai e sue e le Ekalesia . E $160,000 le tupea a le ofisa o aoga ae $10,000 le Ekalesia Otara SAOG ma le $8,000 a le faafeagaiga ia Seleni ma le faletua ia Sara.

1999: Ua mae‘a le fausiaina o le faleaoga muamua ma faagaioi ai ma le laisene a le aoga.

2000: Ua iai le aoga i lalo o le faamalu o le Otara Samoan Assembly of God, ae o le aso 1 o Fepuari na tatalaina ai le aoga ina ua mae‘a le laisene. E laisene le aoga i le 40 o tamaiti. O le filosofia a le aoga, Ia atoatoa ona lelei le vaaia ma le aoaoina o tamaiti e pei ona faia i le aiga. Ona o le aoga, o le Aoga Amata Kerisisano Samoa, ua faamoemoe ia aoaoaina le Gagana Samoa atoa ma tu ma aganuu faasamoa i totonu o mataupu ua faataatia, ma le tāua o aoaoga faakerisiano i totonu o polokalame ua faatinoina.

2008: Na talanoaina ai e le Komiti Faafoe e toe sosoo le faleaoga ona ua tupu ma ola le aoga, ma sa amata ai le anapogi i Aso Lua e tai 2 vaiaso ma fai ona o lenei faamoemoe. Sa iloa e le Komiti sa iai le 10% sa faatino muamua ma sa fai ai le fuafuaga e tuu ese se vaega e faaagaga mo lea polokalame. E leai ni sailiga seleni poo ni saogamea a mātua na faia, sa tapena ma faaputu i tausaga taitasi a o faagaioi tusiata ma polokalame o le aoga. Sa manino lelei le taugata o le soifuaga ae sa silasila mamao le Komiti Faafoe ina ia tauivi e faaputu i lea aso ma lea taimi.

2012: Toe apalai le Tap Funding 1 (Full Funding of Building) i le Ofisa o Aoga, e faafetai ai i le susuga ia Tupai Keneti Apa i le fesoasoani ma galulue faatasi ai mo le apalai.

2013: Na maua ai le tali ua maua le apalai o le Tap Funding 1 e $1.2 miliona, ae o le aso 29 o Iuni sa faamanatuina ai le 25 tausaga o le aoga o Petesa ma suia ai le igoa o le aoga ia Sara Petesa Aoga Amata, o le uiga o le Sara Petesa – “Mai Lenei Fale e Tupuga mai ai Tupu o Nuu.”

2014: Amata le fausiaina o le faleaoga fou.

2015: Mae‘a le fausiaina o le faleaoga fou ma tatala aloaia ai i le aso 26 o Setema e pei ona faataunuuina i le Aso Toonai ua mavae. O le taimi nei ua 90 tamaiti ua aooga i le Sara Petesa Aoga Amata, e 40 tamaiti o loo aoaoina i le faleaoga tuai ae 50 tamaiti i le faleaoga fou. Ma o faiaoga o loo galulue ai o alo ma tamafanau a le Ekalesia ua iu mai ma faailoga mai Iunivesite ua faaaogāina ai le meaalofa mai le Atua.

Staff:

Faleupolu White – Supervisor

Rachel Matai‘a – Assistant Supervisor

Taugata Silulu

Lisi Matai‘a

Lafoai Taoai

Nancy Papalii

Amazing Lofipo

Situa Falemiga – Cook

Penny Aiga – Centre Manager/Administrator

Komiti Faafoe

Ps Seleni Taoai – CEO

Julie Taoai

Ps Freedom Aiga – Chairman

Jacinta Pelenato – Secretary/Treasurer

Ps Unasa Laufiso

Sila Mamoe

Penny Aiga