Sosoo le fale ole PFL ua lē ofi tagata

Aufaigalue ale kamupani PFL
Aufaigalue ale kamupani PFL

Ua silia ile 20 tausaga ole tautua ma le auaunaga a le kamupani ole PFL (Pacific Forum Line) ile mamalu ole atunuu, e ala lea i uta ma faamomoli e auina atu i Samoa ae o isi foi atunuu ole Pasifika.

Ole tasi lenei auaunaga ua toatele ai le mamalu ole atunuu ua lolofi iai e momoli ai a latou uta ma faamomoli ona ole vave ma le faamaoni ole latou tautua, ae le gata i lea ole toatele o alo ma tama fanau Samoa oloo galulue ai oloo mafai lea ona fesoasoani ile mamalu ole atunuu e ala i la tatou gagana.

Ile agai pea i luma ole tautua ale PFL i lona ofisa autu i Magele e latalata ile malae vaalele, ua silasila ai le susuga ile alii pule sili ia Rolf Rasmussen ua fai si toatele ole mamalu ole atunuu ua faaaogaina lea tautua mo latou aiga i Samoa faapea foi i Tonga ma isi atunuu, ma ua ia vaai alofa ai foi i tagata e agai atu ile ofisa ua fai si laititi ma ua feomai foi tagata ma le aufaigaluega pe a oo ile taimi e faatinoina ai galuega ale ofisa.

Ma o lea sa ia lagona ai ua tatau ona fai se isi faiga e ala lea ile faateleina ole fale ina ia lava le avanoa e malolo ma mapu atu iai le atunuu ao faatali a latou mataupu ile aufaigaluega.

Ole aoaulia ole Aso Tofi na tatala aloaia ai loa le isi itu ole auaunaga lenei ale PFL i lona ofisa autu lava i Magele, ma ole susuga ia Rolf Rasmussen ole pule sili lea ole kamupani na ia saunoa aloaia e momoli lona agaga faafetai ile aufaigaluega ona ole galuega oloo galulue ai ile tautuaina ole atunuu, faatasi ai ma lana apoapoaiga ile aufaigaluega ia tatau lava ona alu le vaa ile taimi ua faatulagaina e alu ai le vaa, ae sei vagana ua faaletonu le tala ile tau, pau lea ole vaega e alagatatau ai ona tuai le vaa i ana malaga masani, aua e fitu lava aso oloo faatulagaina e malaga ai le vaa ona taunuu lea i Samoa.

Ole tele o taimi o malaga ale vaa e afea muamua ai Tonga ona faatoa alu ai lea i Samoa, ae sei vagana ua tele se uta e ave i Samoa ona alu muamua ai le i Samoa faatoa afea ai lea o Tonga.

Ole susuga ia Julie Silver mai le Fiji Water na ia ootiina le lipine ma faaulufale loa ele alii pule le mamalu ole aufaigaluega.

Ole loto faafetai ma le agaga fiafia ole alii pule ia Rolf Rasmussen faapea alo ma tama fanau a Samoa oloo galulue ai i lea kamupani ona ole tele ole avanoa oloo ausia ai ele kamupani se tautua mo tagata eseese ole Pasifika, aemaise lava ia Samoa. E 37 le aufaigaluega e aofia ai ma tamalii ma tamaitai Samoa e toalima oloo galulue ai. Ile silasila ale susuga ile alii pule ile faatinoina o galuega ale kamupani, e iai lona lagona e tatau ona toatele ni tagata Samoa e faigaluega i totonu ole kamupani ale PFL, aua a oo ile taimi e pisi ai galuega ao la e mafai ona fesoasoani le isi Samoa ile tagata Samoa, aemaise ai o tagata Samoa e mafai ona galulue ile tautuaina ole atunuu i gagana e lua ole faaperetania ma le gagana Samoa, ma ole toatele foi o tagata oloo agai atu i totonu ole kamupani latou te fesili lava i tagata Samoa.

I totonu ole auaunaga ale PFL e eseese lava vaega e galulue ai tagata Samoa ae na faailoa ele tamaitai ia Suzanna Rawson, ole tele o taimi e pisi ai galuega, ole taimi lea e galulue faatasi ai tagata Samoa i totonu ole PFL ile tautuaina ole atunuu, ma ose faataitaiga lelei tele lea oloo molimauina i totonu ole ofisa lenei ole galulue faatasi o ona tagata.

Talu mai ona faavaeina le tautua ale PFL ile atunuu i uta i vaalele ma vaa a lalo e oo mai ile taimi nei oloo maitauina pea le lolofi atu ole atunuu e ave a latou faamomoli, ae leo faapea ua faatuai ai le tautua ma le auaunaga ale kamupani mo le atunuu.