O se alo o Samoa e ui ina soifua a‘e i Niu Sila, le tamaitai o Basileia Vaifou Tapu Muliaga, ua 27 tausaga o lona soifua, na faauu mai le Iunivesete o Aukilani i le aso 4 o Me 2015, i lona tusipasi o le Bachelor of Education (Teaching).
E lē gata i le tamaitai o Basileia, ae sa faamanuiaina foi lona tuagane, le alii talavou o Aloali‘i Naughton Tapu, ua 21 tausaga, e pei ona faauu mai ai o ia i le Bachelor of Contemporary Dance mai le Unitec Institue of Technology i le aso 21 o Aperila, 2015.
Na faailoa e le tamaitai faauu o Basileia, lona agaga faafetai tele i si ona toalua poo lana manamea ia Junior Muliaga, ona o le telē o lana lagolagosua sa tuu atu mo ia, a o feagai ai Leia ma ana aoaoga, ma ua faigofie ai ona maua lenei taunuuga lelei i ana aoaoga.
E lē gata i lea, o lana faafetai tele i ona mātua, le tina ia Moli Talili Tapu mai le afioaga o Solosolo, ma si ona tamā le susuga Meki Laloaoa Tapu mai Saleilua Falealili.
Ta‘ua e Leia, sa faatāua tele e o latou mātua se lumanai lelei mo latou le fanau, o le ala lea na tuua ai lava nuu ma aiga i Samoa, ae malaga mai i Niu Sila ona o le naunau ia lelei ona faaaooga le fanau.
Ua manatu ai la le tamaitai o Leia, o le mauaina e ia ma lona tuagane o nei faailoga tāua mai a la aoaoga, o se la meaalofa foi lea ma se la faaeaea mo nai o latou mātua mo le tele o faataulaga sa la faia mo latou ma a latou aoaoga.
Auā o le lagolago lava foi lea e tasi sa ave e le aiga atoa, o mātua ia Meki ma Moli Tapu, o lona uso ma ona tuafāfine e toatolu, i le alii o Aloali‘i Naughton, ua mafua ai ona ia selesele i lenei faamanuiaga e pei ona iai ana aoaoga.
Sa faafetaia tele foi e Leia ma Aloali‘i, le lagolago malosi a le la ekalesia, le LifeChurch i Manurewa, auā e la te talitonu, o le fesoasoani tele a le la ekalesia e tauala i upu faamalosiau na atili ai ona faaauupegaina i laua e faamalolosi ma finafinau ia la aoaoga ina ia taulau manuia.
