Sosogi le taifau maua ‘aisa malaevaalele i Fagalii

Ole taifau sosogi o Flame a’o sosogi i atopa’u a pasese na taunuu ise malaga ile malaevaalele i Fagalii ma maua ai le pauta faasāina ole ‘aisa
Ole taifau sosogi o Flame a’o sosogi i atopa’u a pasese na taunuu ise malaga ile malaevaalele i Fagalii ma maua ai le pauta faasāina ole ‘aisa

E lei atoa se vaiaso talu ona tauaao atu ele Hai Komesina o Niu Sila i Samoa le taufai sosogi o Flame lona igoa mo galuega a leoleo e saili ai laau o fualaau ma pauta faasāina, ae maua e Flame se ato a se pasese na taunuu ile malaevaalele i Fagalii o iai i totonu se taga pepa iila ua utu iai le pauta faasāina ole ‘aisa.

Na maua ai foi i totonu ole ato ma ni paipa e ula ai le ‘aisa ma o ia vaega uma ua taofia nei e leoleo mo suesuega ae ua molia le taulealea na malaga mai Tutuila ma ‘aisa. Faaalia e leoleo o lea tagata mai Samoa Tutoatasi sa malaga i Amerika Samoa ma o lona toe taliu i Apia ae maua ai ele taifau sosogi ‘aisa ma paipa i lana ato malaga.

Ole taifau sosogi o Flame na tauaao atu ile vaiaso ua mavae ole sui lea ole isi taifau sosogi na aumai foi mai Niu Sila ua litaea ona ua valu tausaga o galue lea taifau faatasi ma le vaega o leoleo oloo sailia pauta o laau ma fualaau faasāina.

Ose fiafiaga lea ole Komesina o leoleo ma le matagaluega ona ua faaauau pea ona fesoasoani mai le Malo o Niu Sila ile leoleoina o tuaoi o Samoa mai le sao mai iai o faiga solitulafono e pei ole faaulufale mai iai o laau ma pauta faasāina poo nakoti (nacortics).

O nai masina foi ua mavae o lenei tausaga ole a mae’a, na maua ai foi ile malaevaalele lava i Fagalii se afifi na aumai mai Amerika Samoa oloo aumai ai ni ‘aisa. O ni alii se toalua na agai e aumai lea afifi na taofia ma suesueina e leoleo. O i laua ia o Scott Barlow ma Fatu Vagana ua mae’a ona valaau molimau a leoleo ile faamasinoga e lagolago ai o la moliaga ile umia ma le faaulufaleina i Samoa o nakoti.

Ole Aso Faraile ua mavae na aumai ai le faaiuga ale afioga ile tamaitai Faamasino o Tafaoimalo Leilani Tuala Warren ma ua faamaonia moliaga o Scott ma Fatu, ma ole aso 28 o Novema e lau ai se faasalaga. O Scott Barlow sa falepuipui muamua i moliaga lava ole umia ma le faaulufale i Samoa ole ‘aisa.

O sana pusaoloa na aumai ai i Samoa ni oloa o lona faleoloa ma lona toalua na maua ai ma le ‘aisa. Ole alii o Fatu Vagana e alala i Amerika Samoa ae o lana malaga mai i Upolu ise faaipoipoga a se tasi o lona aiga ae molia faatasi ai ma Scott ile afifi na maua ile malaevaalele i Fagalii.