Sootaga a Amerika ma Samoa

Le vasega lona 89 o Pisikoa i Samoa ile uma ane ai ole latou faauuga e galulue ai ile tatou atunuu ile tausaga aoga fou
Le vasega lona 89 o Pisikoa i Samoa ile uma ane ai ole latou faauuga e galulue ai ile tatou atunuu ile tausaga aoga fou

E lē o motusia lava le sootaga lea a Samoa ma Amerika e pei ona amata mai e uluai Pisikoa ole polokalame oloo galulue fua ai alii ma tamaitai Amerika i Samoa. Ole vaiaso talu ai na faauu ai le suiga lona 89. Ole laasaga mulimuli lava lea a’o lei faasee atu loa i o latou aiga ma nuu e nonofo ma galulue ai mo le isi lua tausaga o lumanai.

O lenei soo faaauau e pei ona molimanao iai le malo o Samoa, ole a galulue ai i aoga tulagalua le to’a 16 lea e fesoasoani ile faitautusi faa-Peretania a fanau tulagalua. Peitai ua iai foi ma le talosaga ale Matagaluega o Aoga Taaloga ma Aganuu, ole a fesoasoani foi se vaega itiiti o pisikoa nei i mataupu tau numera.

  Ua faamauina, i totonu ole 10 vaiaso talu ona taunuu mai le kulupu lenei, na aooga ai ile gagana Samoa, ma faamasani i tu ma agaifanua a Samoa. Ole a oo atu loa ile taimi e amata ai a latou galuega i Upolu ma Savaii. Lea ua fuafua mo le tausaga, fou ile a’e ai o aoga.

Ile sauniga ole faatautoga, na faia ele sui o Amerika i Samoa, Mr. Tony Greubel, the Charge d’Affaires ma auai atu iai le Minisita o Aoga Taaloga ma Aganuu, Susuga Loau Solamalemalo Keneti Sio ile maota fono ole malo, le TATTE, Tuiatua Tupua Tamasese Efi.

Molimauina foi le lagolago a puleaoga ua manuia a latou aoga i pisikoa, ae o aiga ua totofi e nonofo ai pisikoa talavou nei. Peitai ole sootaga faaauau ale malo o Amerika ma tagata o Samoa, talu mai le 1967. Na afua mai ile uma ane ai ole afā tele na aafia ai Samoa atoa, ma valaaulia ai loa Pisikoa ile atunuu.

O Pisikoa muamua lava na galulue i nuu i tua, na taulamua ile faamalosia ole asiasiga ole tumamā, ma le faia o poloketi mo le soifua maloloina. E manatua ai lava latou ile fauga o faleui pisikoa, poo faleui na sa fau le ipu sima, ona fau lea ole fola sima i luga ose lua faatafafa, fau ma sona fale e faamalumalu ai. E lē o toe vaaia na faleui i nei aso, ina ua omai Saina ma latou faleui taugofie, ma le suiga ole soifuaga ua oo iai Samoa.

Ole isi kulupu o Pisikoa na sosoo ai, ole au Inisinia ma tagata e tusia ata o fale, o tagata e tausitusi, o tagata e faia famaumauga o fuainumera, ma tagata e popoto e fuafua mea tau ile tamaoaiga. Ma galulue ai ile matagaluega o Galuega lautele.

Oloo manatua pea le isi Pisikoa na ia tusia le ata ole Falefono lea na faatoa tuu atu nei i lalo, peitai oloo atagia lava lana ata ile fale fono fou oloo fausia nei. Maitauina le tele ole sao o Pisikoa i mea tau falega i Samoa, e pei ole malaevalele ua tuu nei foi i lalo, ma faleaoga. Na oo lava ina avea nisi Pisikoa ma faatonu lagolago i matagaluega ale malo.

O isi Pisikoa na galulue ile faiga o suesuega ole taumafaiga e faatonutonu anufe ole mūmū e afua ai le ma’i tutupa, ma galulue ai ile Matagaluega ole Soifua Maloloina ile itu o taumafa tatau.

Na galulue foi isi, e avea ma faufautua i pisinisi laiti, ma fesoasoani e atinae tupulaga talavou.

Ae ole tele lava o pisikoa, na galulue oni faiaoga i potu aoga, ma faufautua ile Matagaluega o Aoga. E ala ile faalauteleina ole silafia o faiaoga, ile galulue faatasi ai lea ma faiaoga i potu aoga. Na latou a’oa’oina mea tau pisinisi, computer, Igilisi, Numera ma le faa-Saienisi.

E oo lava ile alii Palemia, e talanoa foi ia ile sao o pisikoa ma le sootaga ma o tatou tagata, talu mai le amataga. O nisi ua maupaolo ai lava i Samoa ma nonofo mau ai, o nisi ua o ma toe foi mai, ma faapena ai lava ona faaauau ai le sootaga tagata ale malo tele o Meleke ma Samoa, e pei ona molimauina ile Aso Faralie ua tuanai.