Ua tusa nei ma le ono masina talu ona faavaeina le mafutaga a le Pacific Collective Network, ina ia mafai ona mafuta ma faasoa ai tagatānuu o motu o le Pasifika o aumau ma papaaao i Aotearoa.
O le mafutaga lenei na faavae mai e nisi o tupu ma tamalii iloga o lo tatou atunuu, ma le faamoemoe e mafai ona lagolago atu ai i soo se aiga, o faalapotopotoga, o pisinisi, o aulotu ma tagata lautele o le Pasifika ma le tofa na a‘e ina ia fai tagata Pasifika ma ni tagata galulue malolosi ma faamanuiaina ai.
O lenei faalapotopotga na afua ma le faamoemoe maumaututu e lagolago atu i le faigamalo a le National ona e talafeagai lelei nisi o a latou aiaiga ma faatofalaiga ma le soifuaga faakerisianoina o tagata Pasifika.
O le faalapotopotga lenei a le Pacific Collective o loo taitaifono ai le tofa ia Pa‘u Teleiai Edwin Puni, ma le laulau o loo latou faamaopoopoina ma faatulagaina fuafuaga uma e iai le susuga ia Tuilagi Saipele Esera, Sooalo Setu Mua ma Aiiloilo Elise Puni faatasi ai ma le lagolago malosi a sui uma o itumalo ua faamauina o latou sui i totonu o le mafutaga lenei. O le faagasologa mai o le faalauiloaina o le anavatau ma tofa mamao a le Pacific Collective lea e lagolagoina malosi ai le faigamalo a le National, ua maitauina ai le suiga tele ua iai le toatele o tagata Pasifika ina ua malamalama ma silafia le tāua o le lagolago atu ia Toosavili John Key ma lana pati, auā o loo faatāuaina ma amanaiaina ai nisi vaega tāua o le soifua ma le siosiomaga o le soifuaga o tatou tagata ma le Pasifika.
Ua tu lata nei la le faigapalota ma a‘e ai loa se tofa i le taitaifono ma le laulau, auā foi e lei faigofie foi le asa maiga o le amataga ma le faagasologa mai o lenei fatu na totō e nei sui totoa ma le agavaa lelei, ina ua tatau ona fai o se faatasiga e faafoi ai le viiga i le Atua ona o galuega lelei ua uma ona faatinoina, aemaise o le faatalosagaina foi o le Agaga fesoasoani mai o le Atua e faaauauina ai pea lenei faamoemoe seia faataunuuina i le 20 o Setema.
O lea mafutaga sa faia lava i le maota o le leitio Samoa ma le SMG i Manukau ma sa lagona ai le faanaunau atu i le Atua i le sauniga na taitaia lava e le susuga i le faifeau, Susuga Rev. Dan Purcell.
Na mae‘a le sauniga ona saunoa lea o le afioga i le taitaifono, tofa Pa‘u Teleiai Edwin Puni na momoli ai lana faamalo i sui uma lava o itumalo taitasi o loo gapatia ma galulue pea mo le faamalieina o vaega uma auā lava le sauni atu i le faigapalota.
Sa tolaulauina foi ma fofogaina nisi o fuafuaga faataatitia auā lava le agai i luma o le mafutaga nei aemaise o le faanonomanu pea i le Atua e pei o le auga lea o fuafuaga ma polokalame uma a le mafutaga ina ia manuia ma tali mai le Atua e tusa ma manaoga o tagata Pasifika o aumau ma alala i Niu Sila nei.
