Ua suia nei le itumalo ua lesitala ai le suafa o Levaopolo Talatonu Vaai, lea sa lesitala i le lola palota a Gaga‘emauga numera 2 ma avea ai ma faipule o le itumalo.
Ua faamaonia mai e le sui Komesina o faigapalota le susuga Faimalomatumua Mathew Lemisio, ua lesitala nei i le itumalo o Salega le suafa o Levaopolo Talatonu, ma ua aveesea ma le lola palota a Gaga‘emauga numera 2. O loo iai le faamoemoe o lea sui e tauva mai i le itumalo o Salega i le palota tele o le tausaga fou 2016. O le faia o lea suiga ua soloia ai ma le tofi faipule o Gaga‘emauga numera 2 sa umia e Levaopolo Talatonu, ona e lē mafai ona faaauau pea ae ua suia le itumalo ua lesitala ai.
Faaalia e le sui Komesina o faigapalota na faatino lea suiga e le sui a o lei tapunia lē tumau lola palota o itumalo faafaipule uma i le aso 3 o Novema 2015.
Faaalia e Faimalomatumua Mathew o le Fofoga Fetalai o le Palemene e iai le malosiaga e faia ai se faaiuga e tusa o aiaiga o tulafono tumau a le Palemene faasino i vaega faaupufai e mafai ai ona soloia loa le tofi faipule o Levaopolo.
O ia aiaiga o loo manino ai le otometi ona soloia se tofi o se itumalo pe a suia se itu faaupufai e lagolago i ai, ae ua aveese lana lagolago mai le itu faaupufai sa lesitala ai ma tauva ai i se palota mo le sailia o tofi o le Palemene.
O le mafuaaga lea na augata ai se tasi o faipule o le Tautua Samoa le tofa Lealailepule Rimoni Aiafi, ona ta‘utino pe moni o le a ave lana lagolago i le HRPP e tauva ai i le palota tele o le tausaga fou ona o aiaiga ia o le tulafono tumau a le Palemene.
E faatoa mafai ona faailoa e Lealailepule le suia o se pati o le a tauva ai pe a faata‘ape le Palemene i le amataga o le tausaga fou a o lumanai le palota ia Mati 2016.
Talu ai le soloia o le tofi o Gaga‘emauga numera 2 ona ua suia le itumalo ua lesitala ai le suafa o lē sa avea ma faipule o le a lē faia ai se palota laititi e toe sailia ai se faipule ona o lea toe tolu masina ma vaiaso o loo lumanai nei ona faia lea o le palota tele a le atunuu.
E lei maua se avanoa e fesiligia ai le Fofoga Fetalai le susuga Laauli Leuatea Polataivao, i le mataupu ia Levaopolo ae o sona finagalo i se lipoti a le Talamua online, o loo ia faaalia ai ua soloia le tofi faipule o Gaga‘emauga numera 2.
Ua ia faaalia ai foi o le a ia logoina aloaia le afioga i le Ao Mamalu o le Malo e tusa ai ma aiaiga o le faavae pe a soloia se nofoa o se itumalo i le Palemene.
