Ua faamautuina ele Faamasinoga o Fanua ma Suafa i lana faaiuga na fofogaina ile Aso Faraile ua mavae 25 o Aukuso 2017, le pulea faasa’o ole suafa Toi ose matai pitovao ma ose matai tautua foi ale suafa Matai’a o Vaitele ole Sa’o lea ole afioaga.
Ua teena ai ele faamasinoga le mau ale itu na talosaga ale tofa Toi Ioane Ilalio ma le itu talosaga a suli o Toi Silao e faapea o lea suafa ose suafa Sa’o ole nuu ma e iai ona suli ma lona gafa. Na teena ai e Toi Ioane Ilalio i lana talosaga faaiuga ua taoto ale faamasinoga faasino ile pulea faasa’o ole suafa Toi o Vaitele, ma o lea faaiuga na faia ile tausaga e 1976 ao iai le afioga ile Sa’o le susuga Matai’a Siutaulalovasa.
Na finau lea itu talosaga ole nuu o Vaitele ose nuu mavae ma ose nuu o Tulafale. Peitai ole itu tetee a Autagavaia Sakaria ma isi o suli o Uilaefa e faasino iai le suafa Matai’a o Vaitele i Faleata na latou teena uma mau ma le gafa ole suafa Toi na tuuina atu i luma ole faamasinoga e itu na talosaga.
Ole mau ale itu tetee ole suafa Toi e pulea faasa’o ele suafa Matai’a o Vaitele ma ose matai tautua ale Sa’o. Na finau foi le itu tetee e leai se gafa ole suafa Toi aua ole suafa e pulea Faasa’o. Ile faaiuga na fofogaina ile Aso Faraile ua mavae na faaalia ai sa le tatau ile ofisa ole faamasinoga o Fanua ma Suafa ona talia talosaga a Toi Ioane Ilalio ma suli o Toi Silao lea na finau ai e saili suli moni ma suli faavae ole suafa Toi o Vaitele.
Fai mai le faaiuga e feteenai ia talosaga ma le faaiuga ua mausali ale faamasinoga na faia ile aso 22 o Aperila 1976 ua ta mau ai le pule ale suafa Matai’a o Vaitele ile suafa Toi. O lona uiga e mausali lava le pulea faasa’o ole suafa Matai’a o Vaitele. O gafa na tuuina atu e itu talosaga na faaalia ile faaiuga o gafa lava ia oi latou na tupuga mai iai latou na umia le suafa Toi ae le suia ai le ta’otoga ole suafa e pulea faasa’o ma e pule foi le oloo umia le suafa Matai’a o Vaitele poo ai e faasuafa e tusa ai o tu ma aganuu a Samoa.
Sa iai le itu faaopoopo na faaulu e nisi o suli o Alipuupuu ile suafa Matai’a o Faleata ma sa lagolago ai ile mau ale itu tetee a Autagavaia Sakaria e faapea ole suafa Toi e pulea ele suafa Sa’o ole Matai’a i suli e toatolu ole suafa Matai’a o Faleata e aofia ai suli o Uilaefa, Alipuupuu ma Leasiolagi. Peitai sa finau le itu tetee muamua e le aiāiaina fua e suli o Lesioalagi ma Alipuupuu le suafa Toi ona o meatotino e na’o suli o Uilaefa e aiā iai. Ile faaiuga ale faamasinoga ua faaalia ai ua taoto le faaiuga ale faamasinoga o talosaga ole aso 24 o Fepuari 2017 faasino ile suafa Matai’a o Faleata. O lona uiga o lea faamatalaga ale faaiuga ua le toe feaiāa’i suli e toatolu i filifiliga e pei ona faailoa ile iuga ole faamasinoga o talosaga o suli o Alipuu ma Leasiolagi e faasino i Vaimoso, ao Uilaefa e faasino i Vaitele. Ole soloia o suafa Toi na faia ile pule a Toi Ioane Ilalio ua faaalia ile faaiuga ale faamasinoga o Fanua ma suafa ose gaioiga na faia faasolitulafono, ona ua le tausisia ai le faaiuga ole tausaga 1976 oloo ta mau ai le pule ale suafa Matai’a o Vaitele ile faia ose nofo ile suafa Toi.
Fai mai foi lea faaiuga e le faia ese tasi o umia se suafa matai tautua se saofai ase isi tagata ise suafa matai tautua poo se suafa matai pitovao ona e le tusa ai ma tu ma aganuu a Samoa. Ua manino le faaiuga ole 1976 ole suafa Toi o Vaitele e pulea faasa’o ele suafa Matai’a o Vaitele.
