Soloia moliaga o Le Tagaloa Pita

Le afioga i Le Tagaloa Pita ma lana loia le faletua o Sarona Ponifasio, ma alo tamaitai o le afioga ile Papa faapea se tasi o tamalii sa tapuaia le faamasinoga o le afioga Sala Iose oloo fai lana vaaiga
Le afioga i Le Tagaloa Pita ma lana loia le faletua o Sarona Ponifasio, ma alo tamaitai o le afioga ile Papa faapea se tasi o tamalii sa tapuaia le faamasinoga o le afioga Sala Iose oloo fai lana vaaiga

Sa lē mafai ona tauva ile palota tele le afioga ile Papa, Le Tagloa Pita ona ua lē faamalieina le aiaiga o le monotaga e faia ile nuu i totonu o le tolu tausaga.

O se aiaiga o le tulafono o faigapalota na pasia ae toe fā masina faia le palota tele ia Mati o le tausaga nei 2016.

Na mafua ai ona molia ele Komesina o faigapalota lea tamalii ile moliaga o le faia ose tautinoga sese lea sa ia sainia ai le pepa faatumu o sui tauva na faailoa ai ua faamalieina uma ona tulaga agavaa e avea ai ma sui tauva e aofia ai ma le faia o lana monotaga.

Peitai o le faaiuga ua aumai a le faamasinoga faaitumalo ua lē faamaonia ai le moliaga o le afioga ile Papa. E ui ile soloia o le moliaga ina ua lē mafai ele itu ale Komesina o faigapalota ona tuuina atu se mau e lagolago ai le moliaga, peitai ua faailoa ele afioga ile faamasino Vaepule Vaemoa Vaai, i lana faaiuga o le aiaiga o le tulafono o palota ile faamalieina o le monotaga oloo ogatasi lelei ma le finauga sa tuuina atu ele itu tagi.

Peitai ile mafaufau male lagona o lē ua molia oloo faia lana tautua ile nuu e sili ona tele ua faamalieina ai lea manaoga o le tulafono.

O le mafuaaga foi lea na ia sainia ai le pepa faatumu i luma ose loia sa molimauina le tautinoga. Talu ai la ona o lea tulaga ua manatu ai le faamasinoga e lē tatau ona faamaonia le moliaga.

Na faaalia e Le Tagaloa Pita e manino ile faauigaga ale faamasinoga o palota na faia lana iuga ia Fepuari o le tausaga nei a‘o lumanai le palota tele ia Mati, o le faauigaina o le tulafono oloo sosolo ile faamatalaina o le aiaiga ile teuteuga o le tulafono o faigapalota. “Ona foliga mai lea o le agaga o le tulafono e lē mafai e matai faasa‘osa‘o o Tamaaiga ona tauva ile palota, ae o lo‘u talitonuga e lē o le agaga lena o i latou na pasia le tulafono teuteu”.

O le finagalo o Le Tagaloa Pita e faasino ile finauga sa ia tuuina atu o ia o le Papa e lē faia sana monotaga, ae o lana tautua i soo se mea a lona nuu e oo lava ile ekalesia e sili atu ona maualuga ma tele.

E fua lea ile saofaga a le matai oloo fai le monotaga e lē ose mea tele. Na faailoa ele Pulenuu o Sili i lana molimau ile faamasinoga, o monotaga e masani ona fai pe a afea le nuu e ni Malo e fuafua lava ile aofai o tagata e afea le afioaga. Na ia faaalia ai a toaitiiti lava Malo e lima sefulu sene ale matai, ae a toatele ua sao atu le $1 ale matai.

O le afioga ile Papa, a oo ina afio atu ile nuu e maua lava le sefulu poo le sefululima afe tala e nate saunia mole nuu.

O galuega foi o malumalu poo ni fale ole faifeau poo ni faleaoga e faapena lava ona tetele ni seleni nate saunia.

O le tautua lea e pei ona faamatalaina ele pulenuu i lana molimau. O le naunautaiga o le afioga ile Papa ia mafai ona toe silasila toto‘a le Palemene ile aiaiga o le tulafono e faasino ile monotaga ina ia faamanino lelei ai, o le tautua o se mea e sili ona tele atu ma tāua ae o le monotaga ua na‘o sina saofaga a le matai ini mea fai.

O le tele lava o nuu ma afioaga ilo tatou atunuu e faia monotaga tupe a matai ile selau tala ile masina.

O le seleni lea e taoto atu auā fuafuaga o meafai a matai o le nuu i masina taitasi.