Ua saoloto mai le faasalaga e fitu tausaga ma le ono masina i le falepuipui le alii talavou o Ah Fook Ioane ua 19 nei ona tausaga, ina ua aumai se faaiuga a le faamasinoga o talosaga poo le Court of Appeal, ua talia le apili a lenei alii talavou e ala atu i lana loia le tamaitai o Tima Leavai.
O lea taulealea sa molia i moliaga o le ave faamalosi le abduction, faaoolima assault, ma le faia o ni upu tau faafefe ma le faamoemoe e faatino ai se feusuaiga ma se teineitiiti, ma le moliaga o le faaoolima matagā. E tolu vaega na faavae ai se finauga a lenei alii ma lana loia faasaga i le faagasologa o le suesueina o molimau a leoleo, e lagolago ai moliaga solitulafono.
Sa finauina le lei silasila o le afioga i le Faamasino Sili na feagai ma le suesueina o lenei mataupu, i ni molimau na tuuina atu e lē na molia, o ni tina se toatolu e iai lo la fesootaiga faaleaiga.
O tina ia na latou molimau sa latou auai i se Bingo na iai ma lē ua molia. Na molia Ah Fook Ioane ona o se gaioiga solitulafono na tupu i le po o le aso 26 o Tesema 2014.
O le teineitiiti valu tausaga le matua na aafia sa moe i lo latou fale Samoa laitiiti poo se faleoo ma ona mātua.
O le vaveao o le aso lea poo le itula e tolu na alu atu ai se tagata ma sii le teineitiiti faatasi ma lona aluga ma ave i lalo o se koko ei le isi ituala e toetoe faafesagai ma le fale o le teineitiiti. Na faatino ai e lē na faia le gaioiga le faaoolima matagā, ma tala tau faafefe i le teineitiiti.
Na mae‘a ona ia momoli ane lea o le teineitiiti e latalata i lo latou fale ma fai i ai e toe foi. Na te‘i ane le tina o le teineitiiti i le vaveao lea o loo saofai lana tama teine ma fesili pe aisea ua lē moe ai. Na faamatala loa i ai le mea na tupu.
Na fesili le tina i lana tama poo ai na faia le gaioiga, ae sa faamatala le teineitiiti e na te iloa foliga ae na te lē iloa le igoa o le tagata. O le aso na sosoo ai na savali ane ai i tafatafa o le fale o le aiga lē na molia i se auala savali e latalata i ai, ona valaau atu lea o le teineitiiti i lona tina o le tagata lea na faia le gaioiga.
O le aso lava lea na oo ai le tina i leoleo ma faaulu le tagi. O Ah Fook sa fai se latou inuga o ni fagu vodka se lua ma nisi o alii talavou i le po o le aso Kerisimasi o le 2014, lea na tupu ai se vevesi ma manu‘a ai le alii ma se isi taulealea.
Na faavave i le falemai mo ni togafitiga lea na mae‘a ma toe foi atu lea i lo latou nuu o Leauvaa-uta poo le ta o le 3 i le vaveao, o le taimi lea na tupu ai le gaioiga i le teineitiiti. Peitai sa molimau ni tina se toatolu o le aiga o Ah Fook na latou iloa le taimi na o atu ai le siiga ma‘i i le falemai i le po lea, lea e faapea na alu atu ai loa ma lē ua molia i le fale sa fai ai le Bingo sa iai ma nei tina ma fai lana pepa.
Ae na moe ina ua uma se viliga e tasi ma sa taagulu. O molimau a tina nei sa finauina ai e le loia a Ah Fook, e lei faaaogāina e le faamasinoga ona sa teena e mafua i le lē talitonuina o ia molimau.
Sa molimau foi le alii e leai se isi mea na alu i ai i le po lea ina ua foi atu mai le falemai, ae sa agai loa i se tasi o fale o le latou aiga ma moe ai, le fale lea sa fai ai le Bingo. I le silasila a le faamasinoga o talosaga apili, e faigata ona fua i molimau a le teineitiiti na aafia, ma le molimau a lona tina, le mautinoa o le tagata na faia le gaioiga.
O lavalava foi sa ofuina e lē ua molia mai le aso na fai ai le latou inuga, ma le po na tupu ai le solitulafono lea sa faamatala e le teineititi e matuā faigata ai ona mautinoa poo le tagata tonu lea na faia le solitulafono.
E ui ina lagolagoina e le faamasinoga apili le suesuega atoa o moliaga na faia i luma o le faamasino sili, peitai ona o tulaga ua latou maua ia latou sailiiliga, ua taunuu ai i le faaiuga e soloia ma faaleaogaina moliaga o le alii o Ah Fook Ioane.
O Novema o le tausaga ua mavae na amata tuli ai lona faasalaga e fitu tausaga ma le ono masina.
