Soloa ma le au fuefue Leota Ituau Ale mai Solosolo

Ua faaauau ona faalauiloa i luga o lomiga faasalalauga a le afioaga o Solosolo le faatea ai o le Afioga Leota Ituau Ale o se tasi o tamalii o le afioaga.
O se faaiuga na faia i le lua vaiaso talu ai a o lea ua faalauiloa ona o le manatu o le afioaga e talafeagai lea gaioiga.
O se faasilasilaga faalauaitele ua faamautu ai e le afioaga lana faaiuga.
I lea faasilasilaga ua faapea mai ai le afioaga o mafuaaga ua faia ai lana faaiuga ua faapea: Ua matauina e le afioaga o Solosolo le faasili o le pule i le tamalii ua taua.
Ua tuuaia foi e le afioaga le aaitui o Leota Ituau Ale i faaiuga fai a le afioaga. Ua tuuaia foi e le afioaga le faamaualuga o le afioga Leota ma le fuaao o ana faaiuga fai i le afioaga.
Na taua e lenei faasilasilaga o le mafuaaga lea o le a’e ai o le tofa i le Taofia a Malietoa Taulapapa ma le latou tama le susu o Usoalii Taua ma e na au i ao ma le faautagaoo ia Saleutogi Po’e.
“Ua afa e tasi ai le soloa i le aufuefue ma saua i le vailalo ma anetemaina le Afioga Leota Ituau Ale ma le fanau e oo i le faavavau,” o upu ia o lea faasilasilaga.
O loo taua foi i lea faaaliga le matua faapapate’aina ma soloia e a le tu, e a le tu lava Leota ma lana fanau ma le nuu o Solosolo.
O le Afioga Leota Ituau Ale sa tulai mai i le tofi Fofoga Fetalai o le Maota o le Palemene o Samoa i tausaga ua tuanai.
O se tamalii ua iloa i Samoa i lona sao i upufai o Malo, e le gata i lea o lona sao i le atinae o le Kolisi o Samoa e ala i ona tofiga i le Asosi o tama ma teine tuai o lenei aoga tele.
Na tapa nisi o finagalo o le afioaga ma na taua ai e se tasi o sui o le afioaga e lei manao e faalauiloa lona suafa, ua tele gaioiga ua faia e le tamalii e pei ona faatea nei ua mafua ai lava lenei faaiuga.
O nisi o atinae ma galuega i totonu o le afioaga, ua taofi e lenei tamalii ma o ni faiga ua le gata ina taofi ai atinae ae ua faapea foi ona le oo ai nisi o fuafuaga a le afioaga.
Taua foi e Nua Liona, le tasi o sui o le afioaga le tele o faiga ua teena ai e Leota nisi o faaiuga fai a le afioaga ua mafua ai lava lenei manatu.
Na fesiligia pe o le a le vaaiga a le afioaga i le faamalosia ai o aiatatau a tagata soifua ona o loo manino le lagolagoina e le tulafono o le aiatatau a le tagata e filifili ai le nofoaga e faamautu ma nofo ai.
O le finagalo a le Matai lenei na faatalatalanoaina e a tatou lipoti, ua sauni foi le afioaga i le oo o lenei mataupu i luma o le Faamasinoga ma o le a faamalamalama ai foi e le nuu e fai foi o le aiatatau a le tagata e toatasi, ae o le aiatatau a le toatele o le afioaga ua manatu ua oia ona o le Afioga Leota Ituau Ale.