Solipala manao o le kamupani e faatau eleele ma le fale

O le kamupani o loo umia le faletalimalo o le Samoa Traditional Hotel i Ululoloa ma sana paaga o se tagata faipisinisi mai Saina, sa manumalo le la ofo i le lisiina o le fanua ma le maota sa iai le ofisa tutotonu o le Faalapotopotoga o Eleele a Samoa i Tuanaimato, e faia ai se faletalimalo.

O le tausaga ua mavae na faamatuu atu ai loa ia meatotino i le kamupani peitai sa iai ni feutanaiga na faia mulimuli ane i le va o le kamupani ma le Malo, ina ua iai se manao o le kamupani e latou te faatauina ia meatotino a le Malo.

Ua alu alu ia feutanaiga ua lē taunuu i se tulaga e faamalieina ai le Malo, ma ua toe faalēaogāina ai lea faaiuga ae ua toe taatia atu nei le fanua ma le fale mo ni tauofoga mo nisi kamupani ma tagata faipisinisi latou te faaaogāina.

Sa iai le fuafuaga a le Malo e tino mai se faletalimalo i lea nofoaga ia fetaui lelei ma le taimi e faia ai i Samoa taaloga a tupulaga o Malo o le Taupulega poo le Commonwealth Youth Games ia Iulai o le tausaga nei.

Peitai ona o lea ua faailoa mai e le Minisita o Faalapotopotoga tuma‘oti a le Malo le afioga Lautafi Fio Selafi Purcell le toe faasalalauina o ni tauofoga, ua manino mai ai ua lē taunuu lea fuafuaga.

“Sa tuuina atu e le Malo lana fesoasoani atoatoa mo le kamupani sa manumalo ae peitai e iai i le Malo le aiā tatau e puipuimalu ai ana aseta”, na saunoa ai le minisita i se pepa o faamatalaga. O le taimi nei e lē o toe faaaogāina le maota i Tuanaimato ina ua faasee atu le ofisa autu o le SLC poo le Samoa Land Corporation i le fogafale lua o le maketi i Vaitele.

O se faaiuga na faia ina ua filifilia e le Malo le afioga Lautafi e avea ma se matagaluega fou e vaaia galuega uma a Faalapotopotoga tuma‘oti a le Malo poo Government Enterprises.

O le SLC o se tasi o ia faalapotopotoga a le Malo o loo iai le vaaia ma le pulea o eleele uma o le Malo.

Faaalia e le minisita o le fuafuaga o loo iai a le Malo ia faaaogāina le maota ma le eleele o loo iai nei i Tuanaimato o loo i totonu o le nofoaga o loo iai le malae tapolo, e fai ma faletalimalo e faaaogā mo tagata taaalo.

O loo iai foi le fuafuaga e tuu i se pisinisi e faia se faletalimalo i le nofoaga ma le faagaioia o le malae tapolo, ae ua na o se miti lea a le Malo i lenei taimi e lei faamautuina.

Le maota i Tuanaimato sosoo ma le malae tapolo o le Faleata Golf Course, sa iai muamua le ofisa tutotonu o le Faalapotopotoga o Eleele a le Malo le Samoa Land Corporation. Sa manumalo le ofo a se kamupani na te faagaioi ai se faletalimalo ae ua teena e le Malo le manao o le kamupani e latou te faatau le eleele ma le maota o loo iai

Minisita o Faalapotopotoga tuma‘oti a le Malo, Afioga Lautafi Fio Selafi Purcell