Na soisoi le afioga Tofilau Esther Tofilau Tevaga ma ia faaalia e sa’o lelei manatu i nisi fai pisinisi ile lotovale i taumafaiga a isi ae lē o ane e galulue faatasi ma faaleleia pisinisi auā e manuia ai tagata uma.
Ole finagalo o Tofilau na mapuna mai ina ua faia se talanoaga a’o sauni e tufa atu lona silafia tau pisinisi ile mafutaga a sui ole Samoa Business Network sa faia ile faletalimalo ole Tanoa Tusitala ile amataga ole vaiaso ua mavae atu nei.
“Na ou iloa lelei lava le tulaga lena ona o a’u foi taumafaiga tau pisinisi ae sa lē manumalo na uiga ia te au ae sa ou taumafai ma tatalo ile Atua e fesoasoani mai”.
Ole faaliliuina lea ose vaega ole finagalo o Tofilau Esther ile gagana peretania a’o faia le faatalatalanoaga ma le tusitala.
Ole afioga Tofilau na valaaulia ele Samoa Business Network e nate saunia se faasoa mo ona sui auai, ma e ui sa lē auai le toatele ona o tuatuagia tāua ma galuega ole toe tapenaina o a latou pisinisi na afaina ile afā o Gita, ae na faaalia e nisi o sui na auai e pei ole tofa Matamua Filipo Sa’ena, e tāua tele le faasoa a Tofilau e tapasa ai lona foi tagata faipisinisi auā ole afioga ile Tootooalii ose faletua ua leva tausaga o faia ana pisinisi i Niu Sila.
O Matamua Filipo ma lona aiga i Samoa oloo atinaeina le pisinisi taavale rental ole Taumeasina Rental na manumalo ile faailoga ole pisinisi rental silisili ona lelei ile tufaga faailoga ale Pulega o Tagata Tafafao mai i Samoa na faia ile masina amata o lenei tausaga 2018. Ua faaopoopo lea pisinisi ise isi ana taumafaiga ose pamu penisinisi oloo i tafatafa ole Apia Park.
Na ta’ua e Tofilau Esther o ana taumafaiga na amata i pisinisi faaunetupe ma ole tausaga nei ua silasila e faalautele lana auaunaga i Ausetalia. “O pisinisi a tagata Samoa ma isi atunuu ole Pasefika e tāua le galulue faatasi e saili auala e fesoasoani ai le isi ile isi”.
O pisinisi i Samoa e pei ona molimau le faauluuluga ole Samoa Business Network le faletua o Jackie e manaomia lava nisi auala e faaleleia ai aemaise ile itu ile sailia o maketi i fafo. Ole susuga Etu oloo gaosia vai faanatura mo gasegase ole tino mai le laau ole Ano le tumeric na ia faailoa i lea mafutaga le siitia o ana foi taumafaiga tau pisinisi ma ole molimau a Tofilau ose laasaga lelei lea pe a galulue faatasi le aufaipisinisi e taufai atia’e a latou taumafaiga. Ole afioga Tofi Esther Tofilau Tevaga, sa tauva ile palota tele a Niu Sila ile tausaga ua mavae.
O ia foi ose sui ole faalapotopotoga faavaomalo ile taaloga teuteu tino poo le body building. Sa auai o ia ile tauvaga teuteu tino sa faia i Amerika Samoa ile tuanai ole afā o Gita ma o lona taliu mai i Samoa na saofia ai ma lana faasoa i sui ole Samoa Business Network.
