E lē o mapu faamaisega ma saafiafiga a le toatele o le atunuu latou te silafia ma masani lelei i le afioga Leota Leuluaialii Ituau Ale ina ua maua tala o lona tuumalo. O le vaveao o le Aso Lulu, 27 o Aperila 2016 na faamanavaina ai e le Atua ana feau i le ola nei, ona o se gasegase faafuasei e lei tele ni aso na faataotolia ai.
O le molimau a se tasi o ona alo le susuga Ituau Ale, o le Aso Sa i le taeao na faapea atu ai si ona tuaa o ia ua tiga lava se vaega pito i tua o lona ua. Mulimuli ane i le aso lava lea, ona ave lea i le maota gasegase. E lei iai lava ni aso o lona gasegase ae tuumalo i le Aso Lulu o le vaiaso lava na tea nei.
O le mafuaaga lea o le faateia o le toatele e lē gata i Samoa a o atunuu i fafo i le salalau atu o le tala faanoanoa i le tuumalo o le Faasisina, o se tamalii e tausaafia ona uiga ma o se tagata foi e aga mālie ae ‘oa i le gagana ona o le susua o ana saunoaga ma fetalaiga.
O le talafaasolopito o lona soifuaga galue i le Malo, o se tasi sa tautua i le uluai Palemia o Samoa ina ua maua le tutoatasi o le atunuu sa galue ai o se failautusi a le Palemia le afioga Mataafa Fiame Faumuina Mulinuu II.
O ia o se tasi o faipule talavou o le paeaiga o le tausaga e 1970 ina ua pale i le tofi o lona itumalo o Anoamaa i Sisifo. Sa avea ai ma Fofoga Fetalai e talavou le soifua ua na tauave le nofoa o le fofoga pule o le Palemene.
O le 1977 i le asiasiga i Samoa a le tupu tamaitai o Peretania ma lona alii o Pelenise Filipo, sa faafeao ai e Leota le faigamalaga mamalu.
O ia lava sa taimua ma le Tupu Tamaitai i vaega sa feafioa‘i ai le Tupu Tamaitai ma le alii Perenise (silasila i le ata). E luasefulu tausaga o lotolotoi lenei tamalii i upufai o le Malo i le tofi faipule o Anoamaa i Sisifo.
E lei muta lona taumafai pea e toe fia pale i le nofoa o lona itumalo ina ua tuanai le lua sefulu tausaga sa avea ai ma faipule. E ui ina tele lona tamaoaiga ma lona malosi na alu i taumafaiga i le palota ae sa lē solomuli ai.
O le palota tele a le atunuu i le tausaga nei na tauva ai foi Leota, lea na tulaga lua i sui e toatolu sa faia i ai le filifiliga a le itumalo. O lana auaunaga i le atunuu sa galue o se faiaoga i le Iunivesite aoao o Samoa.
Sa galue i le nusipepa o le Samoa Observer mo ni tausaga, ae sa avea foi ma pule o le maketi i Fugalei i se isi vaitau o tausaga ua mavae i le faatoa mae‘a ona fausia lea maketi.
Sa avea foi ma pule o le fale mata’aga o le ekalesia EFKS i Malua, ae na vave ona ia tuua le galuega ina ua fia tauva i le palota tele o le 2011 lea sa lē mafai ai ona tauva ina ua fiu e saili le Pulenuu o lo latou afioaga e saini lana pepa faamaonia o le monotaga i le nuu.
O le a lē galo Leota Leuluaialii Ituau Ale i le toatele o tagata Samoa, ma o le molimau a le toatele, e lē toe maua se isi Leota Leuluaialii Ituau Ale, ona o le faagalo gata o ona uiga ma ana saunoaga.
Manuia lau malaga Leota. Faamaisega foi i le faletua o Wilma le nofo a alo ma aiga na lua aemaise o uo ma aumea mamae.
