Na faasalalau e leoleo le fia maua oni faamatalaga e saili ai se nofoaga o iai le teineititi o Vaaiga Amosa e fitu tausaga le matua, na alu ese ma lona aiga i Falelauniu ile Aso Lulu ua mavae. E alu le faasalalauga a leoleo i luga o fesoota’iga televavave faaonapo nei ua tolu aso talu ona saili e lona aiga le teineititi.

Ole faaiuga ole vaiaso ua mavae atu nei na toe sau ai le isi faasalalauga a leoleo ua toe maua Vaaiga ma ose tasi o aiga na latou agalelei ma vaai le teineititi ae e lē o faamatalaina e leoleo pe na faapefea ona oo Vaaiga Amosa i lea aiga.

Ole Aso Sa ua tea atu nei na maua ai se faamatalaga mai ni molimau e faapea ua molia e leoleo le tamā (step father) ole teineititi ona ua masalomia na faaoolima o ia ile teineititi. Na molimauina e leoleo ile taimi na agai ai e aumai le teineititi ile aiga na latou mafuta oloo iai ni solouli ma totolia ini vaega o lona tino.

“O lea foi e matou te maua faamatalaga e lē ole taimi muamua lea ua sola ese ai le teineititi mai lo latou aiga i Falelauniu,” ole faamatalaga mai se leoleo ua lē manao e faailoa lona suafa. Oloo suesueina nei e leoleo le mataupu ae ua faatulaga ole masina fou ole a tulai ai le step father poo le tamaloa e lē o sona afafine le teineititi o Vaaiga ae ole tama ale fafine ua nonofo nei ma le tamaloa.

“Ose tasi lenei o mafuaaga e tele ina tulai mai ai faafitauli i nisi o aiga ma sosola ese fanau pe afai ose tina poo se tamā e lē o sana fanau moni tamaiti ae ua nonofo ma le tamaloa poo le fafine e ana le fanau”. Ole faamatalaga lea ase sui ole faalapotopotoga oloo vaaia nisi o fanau ile atunuu ua aafia i sauaga ole tino, ma le mafaufau.

Ua i luma nei ole Palemene mo le faia ose faaiuga se tulafono e puipuia ai fanauiti ma ose tulafono ole a mafai ona molia ai mātua poo nisi ua iai le vaaiga ole fanau pe afai e faatalale ma lē faia lo latou tiute ole vaaia lelei o fanau. “Ole tulafono lena ole a saga faamalosia ai ma le feagaiga ole aiātatau o fanau ua talia e Samoa”.

Ina ua toe maua le teineititi o Vaaiga Amosa sa ave e leoleo ma faia ni sailiiliga faafomai i lona soifua maloloina ina ia mautinoa oloo lelei atoatoa.

E lei maua mai se faamatalaga o ia suesuega faafomai ae ua faaalia ele leoleo sinia na mafai ona ia faamatala mai le suesuega a leoleo, e lē o iai se faaletonu ile soifua lelei o Vaaiga seia vagana totolia ma solouli ini vaega o lona tino.