Sola i fafo ae ua masofa le ‘afa miliona a le Yazaki

Sooupu a le matagaluega o Leoleo, Maotaoalii Kaioneta Kitiona ile itu agavale, ma le Susuga Su‘a Tiumalu Muliaga ile itu taumatau
Sooupu a le matagaluega o Leoleo, Maotaoalii Kaioneta Kitiona ile itu agavale, ma le Susuga Su‘a Tiumalu Muliaga ile itu taumatau

Ua lē faatasi ona afaina tulaga tau tupe a le kamupani o le Yazaki Samoa i Vaitele ona o ni gaioiga solitulafono. O lea foi ua toe masofa ma leiloa se isi tupe tele e $500 afe poo le ‘afa miliona a le kamupani, ae ua faaalia e leoleo oloo faia suesuega ae o le tagata oloo masalomia ua sola ise atunuu i fafo, “e lē o iloa poo Niu Sila, Ausetalia poo Amerika”.

O le faamatalaga lea mai le sooupu o le Matagaluega o Leoleo le susuga Taupa‘u Maotaoalii Kaioneta Kitiona ina ua fesiligia poo fea ua fai iai sailiga a leoleo. O lē oloo masalomia sa galue ile vaega o tupe a le kamupani.

“Tasi lenei o ituaiga o solitulafono ilo tatou atunuu ua saoasaoa tele, ae e ui lava ina faapea oloo aliali mai i totonu o Matagaluega ale Malo, ma pisinisi ae e lē o solomuli ai le galuega a leoleo e suesue ma molia i latou e maua molimau ua latou faia pea lenei solitulafono o le gaoi a‘o avea ma tagata faigaluega”, o le finagalo lea o le sooupu o le matagaluega o leoleo ina ua feiloai ma tusitala.

O ni tausaga ua tuanai sa molia ma faasalaina ai ile falepuipui nisi o tagata faigaluega a le Yazaki ona o le toesea foi o tupe a le kamupani. O lea solitulafono na faamaonia ai le totogi pea o aso o nisi o le aufaigaluega sa lē oo atu ile galuega, ae o nisi lava foi sa ile vaega o le au faitotogi sa latou faia se gaioiga na mafai ai ona latou maua ia faamanuiaga tau totogi.

E talu lava foi ona faagaioia le Yazaki i Samoa e lei ‘asa lava se tausaga ma se mataupu faapenei e aliali mai ma aafia ai nisi o tagata sa galulue ai ile kamupani. Ile ‘afa miliona ua toesea e lē o mafai e leoleo ile taimi nei ona faailoa pe na faapefea ona toesea lea tupe tele. “O le tulaga lena oloo agai iai suesuega ae faato‘a iloa tonu pe a mae‘a sailiiliga a Malu o le Malo ile vaega suesue,” o le toe tali mai lea ale sooupu, le susuga Taupa‘u Maotaoalii Kaioneta Kitiona.

E ese mai le suesuega ile tupe gaoia a le Yazaki, o lipoti a leoleo i vaiaso e lua ua tuanai sa faailoa ai foi ni mataupu tau ile solitulafono o le gaoi a‘o avea ma tagata faigaluega. O ni pisinisi ile taulaga o Apia faapea ni faalapotopotoga tuma‘oti sa lipotia ai ni seleni foi ua tagolima iai se tagata poo ni tagata.

E lei faailoaina e leoleo se aofaiga tonu o tupe a ia pisinisi ma se faalapotopotoga ua aafia, ae ua molia nisi oloo faatali aso e suesueina ai o latou moliaga. O le isi lea solitulafono ua taatele ua lē ofi ai le falepuipui i Tafaigata ma Vaiaata.