Ua sefululima tausaga o auai tausala Samoa i Ausetalia i le sailiga o se Tausala o Samoa ae o lea faatoa tatā logo, ma sasa faapao leotele lali ma ili faaili ina ua manumalo mo le taimi muamua se Tausala Samoa Ausetalia i le pale o le Tausala Samoa.
“Sa matou omai ma toe foi filemu pe a lē manuia, ae o lea ua tali mai le Atua i le tapuaiga a Samoa i Ausetalia.” O se finagalo lea o le Faatonu o le Komiti o le Tausala Samoa a Ausetalia e faamautu i Brisbane Ausetalia, le afioga Tolomale‘ava Talevu Koleta Galumalemana Samoa Tagaloa, ina ua maua se avanoa o le tusitala e fesiligia ai sona finagalo ina ua mae‘a le tauvaga na faia i le po o le Aso Toonai na tea nei.
O le finagalo foi o le tuaa poo le tina o le tausala Ausetalia ua manumalo, le faletua o Taupule Fepuleai Samuelu Taufao, o le faamoemoe atoa o lona alo tamaitai sa tuu lava i le Atua, ae o lea ua tali faaaliali ma o le viiga sili lea e ave pea ia te ia.
Na faaalia e le Faatonu le afioga Tolomale‘ava Talevu Koleta, e lē faigofie tapenaga i tausaga uma ona o le lagolago mai pea i fuafuaga a le Malo o Samoa e ala i le sailiga o se tausala o le atunuu e pei ona avea ma taualuga o polokalame o le vaiaso o le Teuila. O le tausaga nei ua atoa ai le Iupeli Siliva o le Teuila poo le 25 tausaga talu ona faatino lenei faamoemoe o le Malo.
O le sailiga o se tausala o Ausetalia o lenei tausaga na faamatala e le Faatonu sa faigata ona e na o le toatolu tamaitai na oo atu le manao e fia lesitala i le tauvaga. Peitai na saunoa le Faatonu o le komiti, o le tauvaga na toe faaui i tua le suafa o le isi tamaitai ona e faapea o tala a nisi o tagata e sili ona lesitala sa‘o mai i le tauvaga i Samoa. O le isi tamaitai na lesitala atu ua tapunia le avanoa.
Na totoe ai na o le tamaitai o Ariana Taufao lea na faia ai loa le faaiuga e lē talafeagai se tauvaga ona ua na o le toatasi le tamaitai ma palota ai loa le komiti e avea Ariana ma Tausala Samoa Ausetalia e tauva i le sailiga o se Tausala Samoa. O le tausaga ua mavae sa iai ni faafitauli na tutupu i le tauvaga ina ua iai se sasi i le faaiuga o le tamaitai e manumalo, le mafuaaga na toe suia ai le faaiuga a le komiti i le tamaitai tauva e tatau ona manumalo. O nei faafitauli na faaalia e le Faatonu o se luitau mo le komiti i le tausaga nei ae o lana faafetai i le lagolago atu pea o le mamalu o Samoa i Ausetalia ua a‘e manuia ai le faamoemoe o lenei tausaga.
O le pitolaau a le tina o Taupule i le tapenaina o Ariana e lei faigofie ona o ia lava sa nafa ma le saunia o ona laei ma isi vaega uma mo le tauvaga. Na tutulu loifofoga o le tina ina ua maua se avanoa e faatalanoa ai ina ua mae‘a le tauvaga, ona sa ia faamatala o le uii lava lea o le la fanau e toafā e lua alii ma tamaitai e toalua. O lona toalua e fealuai i atunuu eseese ona o lana galuega ae o ia lava e nafa ma le lotoifale o lona aiga i le mafutaga ma le fanau. Peitai o lana faafetai i le Atua sa faamuamua pea ma tuu i ai le faamoemoe o Ariana lea ua tali mai i le faaeaina o le uluai Tausala Samoa mai Ausetalia ua manumalo.
O le a avea Ariana ma sui o Samoa i le tauvaga e saili ai se tausala o le Pasefika o le a faia i le Atu Kuki i le tau faaiuiuga o le tausaga nei. O le taunuuga o le tauvaga Tausala Samoa o le 2015, o le 3rd Runner-up poo le tulaga fā ua maua e le tamaitai o Iliganoa Atoa sa lagolagoina e Filipsew. O le tulaga o le 2nd Runner-up poo le tulaga tolu o le tamaitai o Christina Taefu o le tausala Samoa mai Niu Sila, ma le tulaga o le 1st Runner-up poo le tulaga lua o Grace Aloese na lagolagoina e le Apaula Heights.
O isi tulaga i faailoga i vaega togia o le Puletasi ua manumalo ai le tamaitai o Ariana Taufao. O le laei faaleaganuu le (Best Traditional Wear) ua manumalo ai le tamaitai o Grace Aloese. O le Miss Internet na maua e Christina Taefu. O le Miss Personality na toe maua e Grace Aloese.
O le Best Sarong ua maua e Shonna Tagaloa. O le Best Talent na manumalo ai foi Shonna Tagaloa. O le faailoga muamua o le Best Interview na maua e Ariana Taufao. O le faailoga o le Miss Photogenic na maua e Laura Maia‘i. Ma le faailoga o le Miss Tourism na toe suipi ai le Tausala Samoa Ausetalia o Ariana Taufao.
Best Puletasi: Miss Samoa Australia – Ariana Taufao
Best Traditionally Inspired: Miss Apaula Heights – Grace Aloese
Miss Internet: Miss Samoa New Zealand – Christina Taefu
Miss Personality: Miss Apaula Heights – Grace Aloese
Best Sarong: Miss Le Manumea – Shauna Tagaloa
Best Talent: Miss Le Manumea – Shauna Tagaloa
Best Interview: Miss Samoa Australia – Ariana Taufao
Miss Photogenic: Miss Ferri Styla – Laura Maiai
National Tourism award: Miss Samoa Australia – Ariana Taufao
