E tolu ekalesia o le matagaluega a le Samoan Revival Church i Niu Sila ua mafai ona galulue faatasi e saili seleni auā le atinaeina mo le manuia o le galuega, faatasi ai ma le totogiina o le fanua o le Ekalesia e 2 eka ua avea ma meatotino a le ekalesia i Samoa.
E ui e lē o iai se lotu i Samoa ae o le agaga fiafia ma le faafetai i susuga i faafeagaiga ma o latou faletua ua iai le fanua totino o le Ekalesia i Samoa auā ana polokalame faatino pe a malaga i Samoa. O le afiafi o le Aso Faraile na tumutumu ai le Ekalesia o le Samoan Revival Church i Otahuhu i Ekalesia e tolu i Niu Sila aemaise o sui o aulotu mai Sini ma Melepone i Ausetalia, faapea susuga i faafeagaiga ma o latou faletua, sa malaga mamao mai lava i le fia tuu mai o lo latou tau‘au e fesoasoani ai i le faamoemoe o Aukilani. Na tatala le mafutaga i le ‘ava o le feiloaiga lea sa tapena ma faatinoina e le autalavou a Otahuhu.
O le taeao o le Aso Toonai na faatino ai loa le faamoemoe e pei ona atofaina. O le taitai aoao o le Ekalesia mai Sini Ausetalia ia Ps Leafa Faasisila ma le faletua ia Tautai sa tatalaina le polokalame i le la sausaunoaga, ona faasolo lea o nisi o ipu a susuga i faafeagaiga ma sui o aulotu mai Ausetalia sa auai, faatasi ai ma ipu a aiga uo ma ē masani sa tauala atu i nisi o aiga lotu.
Na sosoo ma ipu a matafale taitasi o aiga lotu o le matagaluega i Aukilani, ae taualuga ai i le saasaaga a le faafeagaiga poo le sui taitai aoao o le Ekalesia Samoan Revival Church ia Ps Tuimaseve Misikupa Gasu ma le faletua ia Pisila Gasu.
O le aao tusitusi o le ekalesia i Otahuhu le susuga i le a‘oa‘o ia Ilimaleota Apelu sa fai ma fofoga o le aso ae sa vaavaalua ma le tofa ia Tiatia Faaiva. E $40,000 le seleni sa mafai ona tauaaaoina e le matagaluega i Aukilani, ma o le agaga fiafia lea i susuga i faafeagaiga ma ekalesia taitasi ona o le lagolago ma le loto fiafia o aiga uo ma ē masani ua maua ai lenei seleni mo le galuega a le Atua.
E ui o se faamoemoe na lalaga ona o le manuia o le matagaluega, ae o se avaoa lelei foi ua maua ai le avanoa e mafuta ai tagata lolotu ma talatalanoa e faasoa i le galuega, ua lē gata i faifeau ae o tamā ma tina matutua e oo lava i fanau.
