O nisi o tina sa auai i le faamoemoe faapitoa mo Tina

O nisi o tina sa auai i le faamoemoe faapitoa mo Tina

O le Aso Toonai atu i tua a’o lumanai ai le Aso Sa faapitoa o tina, na faataunuuina ai se fiafia faapitoa aua tina uma o Samoa o alaala ma papaaao i le aai o Melepone, o lenei faamoemoe na faataunuuina e le pulega ma le tautua a le falemaliu Samoa i Melepone, o le pitonuu o Noble Park le nofoaga sa faia ai le faamoemoe lea na molimauina le faatumulia i le mamalu o tina ma tama matutua na afifio na talaaao atu e fiafia faatasi ma luilui aua le faamanatuina o le Aso Sa o tina o lenei tausaga.

Na maua se faatalatalanoaga ma le afioga i le alii pule o le auaunaga a le falemaliu le fetalaiga ia Sauaiga Iapesa ma ia saunoa ai, sa silasila totoa le pulega ma tasi ai le finagalo o so latou lea sao e faafiafia ai nai faletua ma tausi sa’oao ma tamaitai ma tina uma o le atunuu e fia tafafao i lea po e amata aloaia atu ai lo latou aso. Na ia saunoa foi, o le ala foi lea na faapitoa ai le tau o le ulufale, ma agavaa ai tina mo le se’i faapitoa na faia i le faaiuga o le po fiafia, i faailoga faapitoa na saunia lava foi e le auaunaga.  E le’i gata ai i ia vaega le silasila a le pulega, ae na maualuga foi la latou tapenaga mo le fofoga taumafa lea na maua ai taumafataga ise tau taugofie lava mo lea po.

Na saunoa nisi o tina sa mafuta atu i le faamoemoe, ose sauniuniga sa lava tapena, aemaise o le agaga faafetai ona sa le faapito le fiafia mo se ekalesia se tasi, ae mo tina uma lava o le atunuu, e le gata o tina matutua, ae sa maua le avanoa mo tina laiti ma nai tina fou, aemaise o alo o le atunuu o maupaolo atu i tina mai isi atunuu, i le mae’a ai o le faamoemoe ona saunoa lea o nisi o tama ma tuaa sinasina, ua tuai ona oo mai le aso o tama, ae sei sauni e ta’u le sese o le aso o tina.

O le alii pule ia Sauaiga Iapena ma lona faletua (tupito ile itu taumatau) faapea le tina na malo i le faailoga (ogatotonu)

O le alii pule ia Sauaiga Iapena ma lona faletua (tupito ile itu taumatau) faapea le tina na malo i le faailoga (ogatotonu)