Ua teena e le tamaitai loia o Precious Chang o loo avea nei ma faauluuluga mo se taimi lē tumau o le ofisa o le Public Prosecution poo le ofisa o loia ma leoleo o loo finauina moliaga tau solitulafono i le faamasinoga, se faaaliga mai leoleo e faapea ua uma a latou suesuega i le tagi a le faipule o Faasaleleaga Numera 4 le afioga Peseta Vaifou Tevaga ma ua i luma nei o le Loia sili a le Malo le mataupu.
O le fesiligia o le ofisa o le Loia sili pe faamaonia le faamatalaga mai leoleo na faaalia ai, ua lē o toe tagofia e le Loia sili ni mataupu tau suesuega i soligatulafono mamafa ae ua mavaevae nei galuega lea ua tuu ese mataupu uma tau soligatulafono e tagofia e loia a le Malo ma leoleo ua nafa ma moliaga e tuuina atu i luma o le faamasinoga.
Sa fesili le tamaitai loia o Precious Chang pe aisea ua faaalia ai e leoleo ua tuuina atu ia i latou le mataupu ae e lei mae‘a suesuega a leoleo. O i tonu o loo fesiligia ai e le tamaitai loia le afioga Leulua‘ialii Olinda Woodroffe o loo tauaveina le tagi a Peseta faasaga i le Fofoga Fetalai ma nisi o faatonu o le kamupani nonu o le Local Partners i Vaitele, pe aisea ua toso umi ai suesuega a leoleo.
O loo fia silafia e le tamaitai loia pe aisea foi ua tuai ai ona faia e leoleo ni moliaga ona o lona talitonuga ua taulimaina e leoleo ni mau malolosi e faamaonia ai tuua‘iga a Peseta. O le faamatalaga a le sooupu o leoleo ua tea ese ma lima o leoleo suesuega ae ua oo i le Loia sili, e iai le talitonuga o le loia a le alii Faipule o Faasaleleaga numera 4, o se faamatalaga e faamoe a’i le tulituliloa atu pea e lana loia o le tulaga ua oo iai le galuega a leoleo.
O ni tuua‘iga o ni gaioiga solitulafono faasino i le pulea ma le faagaioia o le kamupani nonu o loo autu i ai le tagi a le alii faipule poo le Minisita lagolago o le Matagaluega a le Palemia ma le Kapeneta.
O le atalii o Peseta o se faatonu ma se faisea o le kamupani, ae ua finauina e le alii faipule ua uma ona aumai e lona atalii le ioega e tuu atu ai ia te ia sea sa ia umia, ma o se tulaga o loo tetee i ai faatonu e toalua o le kamupani.
O le Fofoga Fetalai le susuga Laauli Leuatea Polataivao o loo faasaga i ai le tagi a Peseta ona o lona aafiaga i le kamupani ae e lē o iai ni ona sea ma e lē o se faatonu foi. Peitai o lea ua mae‘a ona tuuina atu e Peseta se isi ana talosaga i le faamasinoga maualuga e iai se isi taumafaiga faapisinisi i lalo o le igoa o le Samoa Nonu Delights o loo aafia ai le susuga Laauli. O le pisinisi lea o loo faapea mai le alii faipule ma loia o loo faaaogā e faatau ai le sua o le nonu ona aumai ai lea o tupe ua ave teu i se teugatupe o loo i le igoa o le Samoa Nonu Delights.
Faaalia e le tamaitai loia sinia o Precious Chang i le ofisa o le Director of Public Prosecution, ua ave se fautuaga i leoleo e saili mai se tagata e iai sona tomai i le faamaonia o faamaumauga tau tupe poo se forensic accountant mo le faia o se sailiiliga i ia faamaumauga pe o ni faamaumauga sa‘o ma tonu.
Pau lea o le tulaga o loo silafia e le tamaitai loia ae o lana faamatalaga e lei oo atu se faila o le suesuega i lo latou ofisa. O loo talitonu le loia a Peseta e iai nisi o loo faalavelaveina le galuega a leoleo fua ina toso ma umi o faatali se taunuuga. O le vaiaso nei ua tusi atu ai le loia a Peseta i le Komesina o leoleo ma le ofisa o le Loia sili e tusa o le tulaga ua aliali mai.
