Talofa i le fanauiti faapea nai o latou mātua, aemaise o faiaoga i le aso faamalumalu ma le malulu, ae lei faavaivai ai le tapenaga o le sisiga o le Fu‘a o le Saolotoga a Samoa e pei ona sa faatinoina e le Aoga Amata a SEEDS i le Aso Lulu, 1 Iuni, 2016.
O lenei Aoga Amata e iai tamaiti Initia, Saina, Palagi, Tokelau ma Samoa, ae pepese uma i pese Samoa ma le vii o le fu‘a. E lelei foi la latou faalogo i le gagana Samoa, ma o isi o nei tamaiti laiti mai nei atunuu eseese, ua lelei tele foi le tautala faasamoa. Faafetai tele i faiaoga.
Ina ua uma le sisiga o le fu‘a na gasolo loa maimoaga i galuega faasamoa sa faia e tamaiti mo le Vaiaso o le Gagana Samoa. O le lalaga ma‘ilo, faapipiiga o fulumoa e teu ai ili fulumoa, o valiga ata, o le faiga o le fale Samoa, o le su‘iga ula, ma le tele o isi galuega taulima na faatinoina. Sa faasolo loa ile usuina o pese Samoa, pese palagi ma siva eseese na faatinoina e tamaiti ma faiaoga. Na iai foi le aitema a nai mātua na faatinoina e ala ile siva.
Sa faasolo atu loa i le taimi o taumafataga o meaai samoa e pei o le fa‘ausi, luau ma le umu fa‘i ma taro, ma le tele o taumafa eseese na faaiu ai le faamanatuga o le Sisigafu‘a a le SEEDS i Westmeath, Waitangirua.
E momoli tele atu ai le faamalo ma le faafetai tele i le susuga i le Puleaoga, Tolo Pereira ma Malia Meli na feagai ma le polokalame, faapea mātua ma faiaoga aemaise lava si fanau mo galuega lelei uma ua molimauina i lenei tausaga.
