Sione Faumuina: Mai le Leaga ile Lelei

Ua faatauina nei le Tusi a Sione Faumuina, Sione Faumuina: The Second Phase, ile talaaga o lona soifuaga ile taaloga Lakapi Liki lea sa taalo ai mo Niu Sila ma le NZ Warriors.

Ose tala faanoanoa, ona ole faamaimau‘oa ma taleni a lenei alii i lona malosi ona ole taumafa ‘ava malosi. E matuā tele naua le tupe na ia maua a‘o taalo, e faitau miliona tala, ae e matuā leai ma sana mea aogā na maua ai.

Ole mafuaaga ole tusi a Sione, ole faailoa lea ole tulaga leaga na oo iai, ma le suiga ua iai nei i lona olaga. Ole suiga lea na amata ile 2009 ile taimi na ia ritaea ai, aemaise le amataga o lona olaga faiaiga ina ua soifua mai si ona afafine pepe. Na toe liliu ai lona olaga ma ia fulitua ile ‘ava malosi lea ua atoa nei le tolu tausaga e lē o toe pa‘i iai.

Ole 18 o ona tausaga na amata ai ona taalo i ‘au tetele a Niu Sila. Na amata ile Auckland U18, sosoo ai ma le sainia o ia ele NRL ile kalapu ale Canberra ile tausaga lava lea.

Ole amataga foi lea o ona faafitauli ma faaletonu o lona olaga. Ile nofo ai i Canberra, sa fai lava si faigata ona ole misia e ia o lona aiga i Aukilani. O iina na amata ai lona ona inu pia, ona ole leai ose isi la te toalua.

Na ia so‘aina le tamaititi aoga i lana taavale a‘o ‘onā. Ae e lei suia ai lava lona olaga. Na ta‘ua e Sione, na matuā malosi lava lana inu. Ole tele o aso e ta‘i 20 ipu ‘ava na te inuina, ole tele lava ole Vodka, ma faaopoopo iai ma isi ‘ava malosi, e mai le afiafi seia oo ile aoauli ole aso e sosoo ai. Ole isi mea, tusa poo le ā le tele o lana seleni na maua, e uma ane le vaiaso e matuā lipi ma se tupe ile tino.

Ae o lana taleni, ose tagata taalo malosi ma le lelei tele. O lea foi taleni na vaaia e Canberra Raiders ile 18 o ona tausaga ma le NZ Warriors, ma oo lava ina filifilia o ia e Niu Sila mo le Kiwis. O isi ‘au na taalo ai Sione ole North Queensland Cowboys, ma kalapu e tolu i Egelani.

Ae e lei umi sona taimi ile tele o kalapu nei, na faamuta ma tuli o ia ona ole faaleagamea, ma le inu ‘ava malosi. E foliga na tutusa lelei le alu i luma o lana taleni ma le leaga o lana amio na oo iai.

A‘o iai ile Warriors, fai mai Sione, ole tele o aso e tafao lava seia aulia le ao, ile 7 poo le 8 ile taeao faatoa alu ai ile fale. O isi aso, e alu sa‘o lava mai nofoaga sa tafao ai ile kalapu i toleniga ale Warriors.

Ole mafuaaga foi lea ole tele o taimi na ia misia ai taaloga. Na ripotia le tele o nei faaletonu i nusipepa i totonu o Niu Sila ma Ausetalia. Na faamuta foi ele Warriors lana konekarate.

A‘o taalo ile Cowboys, na toe lavea ai foi le isi taavale, na taavalevale faatolu faatoa tu ai. Na molia ia i luma ole faamasinoga i moliaga ole faaoolima ise tagata i Yorkshire, Egelani. Na tuli foi mai lena ‘au ile alu atu i toleniga a‘o tau ile ua le ‘onā.

Ae ua suia mea uma, ole uiga foi lea ole igoa o lana tusi Second Phase, poo le avanoa lona lua.

E lagonaina ele tagata faitau le maualalo ole tulaga na oo iai Sione, ma le leaga na ia savalia. Na vaavaalua le leaga ma lona manao e sui lana amio. Ole tele o taimi na matuā lelei lana taalo ma pulea ana amio, ae e toe foi lava ile leaga. Na ta‘ua e Sione, ose mea faigata tele lea.

O na mea uma, ua fai ma lesona ia te ia. Ua tolu nei tausaga e lei toe tago o ia ile ‘ava. Ae ua avea foi o ia ma se tagata matua ina ua fanau mai si ona afafine, ua suia ai ona mafaufauga ma ua faamatua ai lona tagata ma lona mafaufau.

Ole tausaga 2014 na amata ai nei suiga uma ina ua fanau mai lona afafine. E oo mai ile taimi nei, e lei toe tago lava o ia ile ‘ava. Ana le tuua le ‘ava, e lē toe maua e Sione le avanoa na te vaaia ma tausi si ona afafine. Ole tusi Sione Faumuina: Second Phase, e maua ile tele o Faletusi i Niu Sila.