Na faia‘ina le Manu Samoa i le ‘au malosi a le Barbarians i le uluai taaloga a le Manu Samoa e sauni ai mo le Ipu o le Lalolagi i ‘ai e 27-24 lea na taaalo toasefulutolu ai i le faaiuga.
E lei umi na amata le taaloga ae tuli i tua le loka a le Manu Samoa ia Cane Thompson lea sa faaoolima i le hooker a le Barbarians ia Saia Faingaa. O le taimi lea na amata malosi ai le osofaiga a lenei aufili ma taufao ai le sikoa o le taaloga.
E lua sikoa a la latou numera sefululua ia Ben Tapuai ma isi sikoa e lua ae o Samoa na uluai laasia e Anthony Perenise le laina sosoo atu ai ma Jack Lam. Ae peitai o le taaalo sefulufā ai o le Manu na vaaia ai le alu o le malosi i le puipui e ui na faigata e le Barbarians ona faaopoopo nisi ‘ai.
Na vaaia foi le faigata e Tim Nanai Williams ona faaaogā avanoa laiti e amata mai osofaiga mai le fulupeki pe a faatusa ia Paul Williams lea sa taalo mai le Barbarians. O isi tama Samoa na auai i le Barbarians i lea taaloga e aofia ai Christian Lealiifano, Ben Tapuai ma Paul Williams.
Na sui tulaga atu Patrick Faapale ia Tusi Pisi ae o le taumafai atu o Faapale e faasalavei se pasipasiga a le Barbarians na ili ai le faaili a le laufali ma faasala i le pepa samasama, ma e uma lava le taaloga o taaalo sefulutolu le Manu Samoa.
E ui o lea faia‘ina o le isi taaloga faavevela i le vaiaso fou o le a taaalo ai ma le RFC a Wasps. I se tasi vaaiga o le ‘afa ia Vavao Afemai, lea na suitulaga ia Kahn Fotualii na mataina lana taalo i toe taimi o le taaloga i ana pasi ma taimi na sao atu ai mo le se avanoa e lalata i le laina sikoa.
