Taitaifono: Rev. Falemai Mika
Failautusi: Rev. Avau Faafuata
Teutupe: Leifi Ioapo
O se vaiaso pisi na se‘i mavae atu nei i totonu o Kuiniselani. E le gata o faigamalaga e masii ese atu, ae o usugafono foi ma fuafuaga a Ekalesia ma aiga sa tauaofia ai i Brisbane nei.
O le susuga lava i le Sea o le Faasinoti sa tatalaina aloaia le fonotaga a le Sinoti a le Ekalesia Metotisi Uesiliana i le po o le Aso Faraile, aso 6 o Iulai 2012 i le 6:30pm i le afiafi, i se sauniga lotu, sosoo ai lea ma le mafutaga tatalo a le Auso Evagelia i lea lava po i le Hall o loo tapuai ai i le Boronia Height State School. Ina ua mae‘a, ona malolo ai lea mo lea aso.
O le Aso Toonai, aso 7 o Iulai 2012, sa amata lava i le fono a Tina, Auso Evagelia ma sa taitaiina lea e lo latou Peresetene, le faletua ia Keli Mika. O le failautusi o le faletua ia Toelau Faafuata. Sa amata i le 8am i le taeao, ae mae‘a i le 12pm i le aoauli, ma alo ai mo se malologa, ona sosoo ai loa lea ma le fono tele. O nei Fono uma e lua o le sailia lea o ni mau tāua ma le aogā auā le atiae ai o le Ekalesia a le Atua i Niu Sila ma Ausetalia, lea o loo faia i le masina o Oketopa i tausaga taitasi i Niu Sila.
Na faaiu ai lea aso i le afifio atu o aiga na lua, le Afioga ia Galumalemana Naea Timoteo, Tuala T Tuala, Maualaivao Timoteo ma le Tulafale Tuaautotoa, Auimatagi, Pone, Timoteo, ona o la latou taulaga tagata ua filifilia nei e avea ma Sea o le faasinoti i Ausetalia.
Ia faamanuia le Atua i le taulaga sa osia e le aiga alii, ma ia toe faatutumu atu mea ua faagaogaoina ona o le Atua ma lana galuega.
